ҚТЖ жүк тасымалы мен теміржолдағы оқиғаларға түсініктеме берді
2025 жылдың 11 айындағы қорытынды бойынша ҚТЖ желісімен ел тәуелсіздігі жылдарында рекордтық жүк айналымы қамтамасыз етілді: пайдалану жүк айналымы 264,7 млрд т-км (өткен жылдың деңгейіне+7,4%) құрады, тасымалдардың жалпы көлемі 287,9 млн тоннаға (+4%) жетті. Қозғалыстан уақытша шеттетілген пойыздардың саны 96 бірлікті құрайды, бұл 2022 жылғы желтоқсандағы көрсеткіштен 6 есе төмен, деп хабарлайды Rail-news.kz.
Қатысушы теміржол әкімшіліктерімен жүргізілген жұмыстардың арқасында осы бағыттардағы тасымалдау көлемі өсуде: ағымдағы жылдың 11 айында ҚХР-мен тасымалдау көлемі 11%, Өзбекстанмен тасымалдау көлемі 16% өсті. Орталық Азия елдеріне 5,6 млн тонна астық тасымалданды, бұл 2024 жылдың сәйкес кезеңімен салыстырғанда 32% артық, оның ішінде Өзбекстанға – 4 млн тонна (+31%).
Өзбекстан бағытындағы жүктердің қозғалысын реттеу үшін тағайындалған станциялар, жүк алушылар және Ташкент торабының тәуліктік түсіру қуаты келісілді. Бұл ретте мәлімделген жүк көлемдерінің сәйкес келмеу жағдайлары анықталды: қазақстандық жөнелтушілер 13 мың вагонды, ал өзбек тарабының алушылары 8 мың вагонды растады, бұл тасымалдауды жоспарлауға әсер етті.
ҚХР мен Өзбекстан бағытындағы жоспарларды келісу көршілес теміржолдардың жүктерді қабылдау мүмкіндіктеріне сүйене отырып жүзеге асырылады. Бұл рәсімдерді сақтамау Қазақстан аумағында тоқтап тұрған вагондар мен тастап кетілген пойыздар санының өсуіне әкелуі мүмкін.
Барлық өткізу қабілеттілігі ай басталғанға дейін негізгі жоспарлар бойынша бөлінеді. Қосымша жоспарлар негізгі жоспарлар орындалмаған кезде ғана қаралады, бұл Жүктерді теміржол көлігімен тасымалдау қағидаларының 39-тармағына сәйкес келеді.
Алматы – 2 вокзалындағы газбен улану жағдайы туралы ақпарат бойынша: пойыз жеке тасымалдаушыға тиесілі және «Жолаушылар тасымалы» АҚ иелігіне жатпайды. Барлық мән-жайларды құзыретті органдар анықтайды.
Сондай – ақ, 2025 жылғы 10 желтоқсанда Мойынты – Шығанақ учаскесінің Шешенқара – Қаражаңғыл аралығында рельс ауыстыру бойынша жоспарлы жұмыстарды орындаған Сарышаған станциясы жол бригадасының қатысуымен жазатайым оқиға болғанын хабарлаймыз. ҚТЖ зардап шеккендер отбасыларына толық көмек көрсетеді. Компанияның бас инженері басшылығымен «ҚТЖ – Жүк тасымалы» ЖШС және Магистральдық желі дирекциясының басшылығымен арнайы комиссия құрылды. Оқиға орнында уәкілетті мемлекеттік органдар өкілдері жұмыс істеуде. Жедел шешімді талап ететін барлық мәселелер ерекше бақылауға алынды.