Теміржол көлігімен жүк тасымалы көрсеткіші тұрақты өсімді көрсетуде

2026 жылдың бірінші тоқсанында «Қазақстан темір жолы» ҰК» АҚ желісі бойынша 64,5 млн тонна жүк тасымалданды. Былтырғы жылдың сәйкес кезеңімен салыстырғанда бұл көрсеткіш 360 мың тоннаға артық. Ішкі тасымалдар 40,8 млн тоннаны, экспорт 23,7 млн тоннаны (+2,2%) құрады, деп хабарлайды Rail-news.kz.

Әлеуметтік маңызы бар жүктерді тасымалдау мәселесі ерекше бақылауда. Биылғы жылдың қаңтар-наурыз айлары аралығында 27,4 млн тонна көмір (+3%) тасымалданса, оның 19,8 млн тоннасы ішкі нарыққа (+4%) бағытталды. Астық тиеу 15,4% өсіп, 4,1 млн тоннаны құрады, оның ішінде экспорт – 3,3 млн тонна (+17,5%). Экспортқа шығатын ұн тарту өнімдерін тасымалдау көрсеткіші 6,2%, яғни 570 мың тоннаға дейін ұлғайды.

Өсім тасымалданатын жүктің басқа да түрлері бойынша тіркелді. Мәселен, қара металдар - +18% (1,3 млн тонна), темір және марганец кендері - +14% (2,7 млн тонна), тыңайтқыштар - +3% (1,2 млн тонна) тасымалданды.

«Қазақстан темір жолы» ҰК» АҚ желінің тұрақты жұмысын және экспорттық тасымалдардың өсуін қамтамасыз етеді.