«ҚТЖ – Жүк тасымалы» 40 жылдан астам еңбек еткен 12 теміржолшыны марапаттады
«Қазақстан теміржолшысы» газетінің тілшісі
7 қазан – Дүниежүзілік лайықты еңбек үшін іс-қимыл күні. Бұл күн еңбек адамдарының заңды құқықтары мен мүдделерін қорғаудың, қауіпсіз және лайықты еңбек жағдайларын қамтамасыз етудің маңыздылығын айқындайды.
Атаулы күн аясында «ҚТЖ – Жүк тасымалы» ЖШС-де өткен салтанатты шара адал еңбекті дәріптеуге арналды. Теміржол саласында 40 жылдан астам еңбек еткен 12 қызметкер марапатталды: олар Салтанат Айтбаева, Забира Ахажанова, Болат Бирманов, Тасболат Каримов, Иван Костыря, Әлия Медебаева, Ақылбек Рамазанов, Бақтыгүл Сагиева, Елена Сатыбалдина, Болат Сүлейменов, Жанбек Түсіпаев және Сәуле Шарипова.
– Олардың көпжылдық адал еңбегі, жоғары кәсібилігі және теміржол саласының дамуына қосқан үлесі – жас буын үшін үлгі. Лайықты еңбек – бұл қауіпсіз еңбек жағдайлары, қызметкерлердің құқықтарын құрметтеу, әлеуметтік кепілдіктер, тұрақтылық және кәсіби дамуға мүмкіндік. «ҚТЖ – Жүк тасымалы» ЖШС үшін қызметкерлердің қауіпсіздігі мен әл-ауқаты, олардың еңбек құқықтарын сақтау, қолайлы еңбек жағдайларын қалыптастыру және әрбір маманның еңбегін бағалау – маңызды басымдықтардың бірі. Барша әріптестерімізге еңбектеріңіз үшін алғыс білдіреміз! Қауіпсіз еңбек, тұрақтылық, кәсіби табыс пен жаңа жетістіктер тілейміз! – дейді «ҚТЖ-Жүк тасымалы» ЖШС аппарат жетекшісі Әділжан Исмұханбетов.