Қытай-Еуропа-Қытай теміржол контейнерлік маршрутына биыл 10 жыл толып отыр
«Қазақстан теміржолшысы» газетінің тілшісі
Қытай-Еуропа-Қытай халықаралық теміржол контейнерлік маршрутының белсенді жұмыс істеп жатқанына биыл 10 жыл толып отыр. Осы уақыт ішінде халықаралық байланыстар арқылы Қытайдан Еуропаға және кері қарай 33 мыңнан астам контейнерлік пойыз қатынаған. Оның 53 пайызы Достық-Алашанькоу және Алтынкөл-Қорғас теміржол өткелдерінен өткен. Алғашқы халықаралық контейнерлік пойыз Еуропаға Алашанькоу-Достық шекаралық өткелі арқылы Чунцин станциясынан (ҚХР) 2011 жылғы 19 наурызда жөнелтілген болатын. Пойыз Қытай, Қазақстан, Ресей, Беларусь, Польша және Германияның мемлекеттік шекаралары арқылы 16 күнде 11 мың км астам қашықтықты жүріп өтті. Пойыздың жылдамдығы тәулігіне 726 км құрады. Құрам Дуйсбург станциясына межеленген мерзімнен екі күн бұрын келіп жетті. Бүгінгі таңда Қазақстан аумағы бойынша контейнерлік маршруттар Қытай-Еуропа, Қытай-Орталық Азия елдері, Қытай-Ресей бағыттары бойынша, сондай-ақ Қазақстан порттары арқылы Кавказ, Парсы шығанағы, Түркия және басқа елдерге жөнелтіледі. Бұл ретте, транзиттік жүктің басым бөлігі өтетін дәстүрлі бағдарды Қытай-Еуропа-Қытай маршруттары құрап отыр. Жүкті жеткізудің оңтайлы мерзімі маршрутқа байланысты 7-ден 16 күнге дейінгі аралықты құрайды. Халықаралық транзит ағыны жылдан-жылға артып келеді. Жаһандық пандемияға және карантиндік шаралардың енгізілуіне қарамастан, транзиттік контейнерлік тасымалдар көлемі 2020 жылы 65% өсіп, 517,5 мың ЖФЭ-ні құрады. Ал пойыздың орташа жылдамдығына келсек, ол тәулігіне 1150 шақырымға жетіп отыр.