Ақтөбеліктер де іргелес жатқан маңғыстаулықтарға қарайласа бастады
Ақтөбе облысы бойынша меншікті тілші
Ақтөбе облысының Шұбарқұдық станциясында Маңғыстау өңіріндегі қуаңшылыққа байланысты зардап шегіп отырған шаруаларға жем-шөп жөнелту жұмыстары жүріп жатыр. «Қиындықта ел бірге» акциясымен көрші облысқа қолұшын беруге ақтөбеліктер де бір кісідей жұмылды. Шұбарқұдық станциясының бастығы Алтай Абдуллиннің айтуынша, бес вагон жем-шөп Шетпеге, жеті вагон Ақтау қаласының өзіне жеткізіледі. Игі іске теміржолшылар да бар мүмкіндігінше қолғабыс етуде.
«Вагондарды тиеу орнына жеткізіп беріп тұрмыз. Шөп әкеліп жатқан жүк көліктеріне ыңғайлы жерлерге вагондарды қойып жатырмыз. Жеткізу үшін ең төменгі тарифтер қойылған», – дейді Шұбар станциясының басшысы Алтай Абдуллин.
Қазіргі күні облыс аумағындағы шаруа қожалықтары мен кәсіпкерлер станция аумағына шөп тасып жатыр. Теміржолшылар тарапынан жүк көліктері кідіртпеудің барлық шаралары жасалған. Өңір жамағаты мешіттерде ұйымдастырылған қайырымдылық шарасы кезінде 2 миллион теңге жиналып, басқа облыс мешіттерінен 4 050 000 теңге қаражат түскені хабарланды. Жалпы көлемі 6 050 000 теңгеге 7500 түк шөп сатып алынып, Қызылорда облысының Арал өңіріне 2500 түк шөпті жөнелтіп те үлгерген. Жем- шөптің қалған бөлігі Маңғыстау өңіріне жөнелтіледі.