Жылу беру маусымында ел ішіне темір жолмен 71 млн тонна көмір тасымалданбақ
«Қазақстан теміржолшысы» газетінің тілшісі
Үстіміздегі жылдың мамыр мен тамыз аралығы және қыркүйектің 15-не дейін «ҚТЖ» ҰК» АҚ желісі бойынша 36,4 млн тонна көмір тиеліп, тасымалданған. Тас көмірдің басым бөлігі – 27,7 млн тоннасы еліміздің тұтынушыларына жөнелтілсе, экспортқа 11,6 млн тоннасы шығарылған. Бұл туралы «ҚТЖ-Жүк тасымалы» ЖШС алаңында әкімшілік, көмір разрездері мен жол бөлімшелерінің өкілдері қатысқан қатты отынның тиелімі мен түсірілімін қамтамасыз ету бойынша өткен кеңес барысында белгілі болды. Жылыту маусымына дайындықтың мамыр айында басталып, көмір тиелімі жоспарының алдын ала бекітіліп қойғанына қарамастан бірқатар аймақтардың, атап айтқанда, Шығыс Қазақстан, Павлодар, Оңтүстік Қазақстан облыстары мен Нұр-Сұлтан қаласының жоспарды орындамағаны белгілі болып отыр. Қыркүйек айында көмір разрездері 8,7 млн тонна көмір тиеп, тасымалдауға тапсырыс берген. Алайда, «ҚТЖ-Жүк тасымалы» ЖШС басшылығы көмір тиелімін ай сайын 8,8 – 9 млн тоннаға дейін жеткізу қажет деп санайды. Оның себебін, олар күздің қара суығы мен қыс маусымында көмір тасымалына қатысты жүктеме мен жылжымалы құрамның жетіспеушілігін болдырмаумен байланыстырып отыр. Жалпы биыл 103 млн тонна көмірді тасымалдау жоспарланған. Соның ішінде 71 млн тоннасы ел қажеттілігін өтеуге бағытталса, қалған бөлігі сырт елдерге жөнелтілмек. Кеңес қорытындысы бойынша жол бөлімшелерінің басшыларына көмір тасымалына қатысты тапсырыстың орындалуын қамтамасыз ету жұмыстарын жалғастыруға, сондай-ақ, вагондардың көмір тиеу және түсіру операциялары кезінде тұру мерзіміне бақылауды күшейтуге тапсырма берілді.