Вагонмен қамтамасыз етуде қарбалас жоқ

Жүк жөнелтушілерді жылжымалы құраммен қамтамасыз ету бүкіл тасымалдау процесіне әсер етеді. Еліміздегі жүк вагон паркінің ірі операторы «Қазтеміртранс» компаниясынан бөлек жекеменшік тасымалдаушылар паркі бар. Бүгінгі таңдағы ахуал қандай, жүк вагондары жеткілікті ме?

  «Қазтеміртранс» акционерлік қоғамы Атырау филиалының бастығы Саламат Төлегеновтің айтуынша, филиал Атырау және Маңғыстау жол бөлімшелерімен бірлесе әрекет етіп, тасымалдауды ұйымдастыру процесін жақсарту үшін үнемі ізденісте жұмыс істеп келеді. Нәтижесінде Қазтеміртранс вагондарына тапсырыс көлемі артқан. Магистральдық желінің 3 мың шақырымға жуығы – нақты 2099,4 км (Атырау бөлімшесі – 915,3 км, Маңғыстау бөлімшесі – 1184,1 км) аралығында теміржол қозғалысының үзіліссіз, қауіпсіз қызметін ұйымдастыру жолында тасымалды жүк вагондарымен   жеткілікті түрде қамтамасыз ету айрықша роль атқармақ. 

2022 жылдың 7 айында 19 669 вагонға тапсырыс берілген, оның орындалуы 18 825 вагон, яғни 96% құраған. Орындалмаған 4% жүк жөнелтушілер тарапынан тапсырыстан бас тарту, құжаттардың дұрыс болмауы сынды кедергілерден болған. 

Жеті айда Атырау мен Маңғыстау филиалдары бойынша жүк тиеу үлесі жоспар бойынша жүз пайыз орындалған. Жалпы, өткен жылдың осы кезеңімен салыстырғанда көрсеткіштердің өсімі байқалады. Тұрақты жүк жөнелтушілер: «Иси Гипс Индер» ЖШС, «Рауан Налко» ЖШС, «Карат» ЖШС, «Казына-Мангистау» ЖШС, «Фирма Сабытай» ЖШС,«Раббым-Курылыс» ЖШС, «Айби-Тас» ЖШС, т.б. ірілі-ұсақты компаниялар пандемиядан кейін жұмыстарын ширата түскені байқалады. 

Вагондардың техникалық   қауіпсіздігін қамтамасыз ету де басты міндет. Вагондарды жөндеу, олардың қауіпсіздігін арттыруда атқарылып жатқан жұмыстар аз емес. Бұл мәселені басты назарда ұстап отырған «Қазтеміртранс» АҚ-ның Атырау филиалы вагондардың ағымдағы жөндеу жұмыстарын Атырау, Маңғыстау вагон пайдалану деполары арқылы жүргізеді. Ал, күрделі деполық жөндеу жұмыстары Қазалы, Балқаш, Орал, Шалқар вагон жөндеу деполарында жасалады. Яғни, жүк вагондарын жөндеудің жоспарлы түрлерін жасалған шартқа сәйкес сервистік компания жүргізеді. Компания үшін вагондарды жөндеу бейінді қызмет емес екендігіне қарамастан, ол қатаң талдау және бақылау арқылы жүзеге асырылады. 

Филиалдың өндірістік-техникалық вагон паркі, шұғыл жұмыс бөлімдері бірлесіп жұмыс жасайды. Пайдаланған жүк вагондарын қадағалау мен оны жоспарлы жөндеуге ұдайы көңіл бөлінеді.Вагондар тапсырыс берушіге жарақты күйде жеткізіліп, жол-жөнекей қауіпсіздік ережелерінің мүлтіксіз сақталуы шарт. Сондықтан, жөндеуді қажет еткен вагондар цехтарда мамандардың қолынан өтіп, жарамсыз бөлшектері ауыстырылып, жаңартылады. Күрделі жұмысты қажет еткен жағдайда деполық жөндеуге жөнелтіледі. Ал пайдаланудан мүлдем шығарылған, жұмыс жасамайтын парктегі жүк вагондарының есебі алынып, тиісті құжаттарын жасақтау негізінде есептен шығарылады. 

– Жалпы «Қазтеміртранс» АҚ Атырау филиалының жұмысы мен жұмысшылардың еңбек қауіпсіздігі жоғары деңгейде қамтамасыз етілген деп айта алам. Вагонмен қамтамасыз етуде қарбалас жоқ, тапсырыстар уақытылы орындалып отыр. Кәсіпорын жұмысшылары арнаулы киім және жеке қорғаныс құралдарымен толық қамтылған. 

Өткен жеті айда жарақат алудың алдын алу шараларын өткізудің нәтижесінде апатты жағдай, келеңсіз оқиғалар болған жоқ, – дейді мекеме басшысы.