Ақмола облысында 16 вокзал жаңғыртылуда
Республика бойынша 125 вокзалды ауқымды қайта құру аясында Ақмола облысында 16 теміржол инфрақұрылымын жаңарту қолға алынды, деп хабарлайды Rail-news.kz.
Еркеншілік, Бурабай курорты, Макинка, Көкшетау, Елтай, Сарыоба, Өлеңті, Державинская, Атбасар, Аршалы, Жақсы, Ерейментау, Есіл, Ақкөл, Жалтыр, Шортанды станцияларындағы вокзалдар жаңғыртылуда.
Қайта құру вокзал ғимараттарын қалпына келтіруді, іргелес аумақтарды абаттандыруды, инженерлік коммуникацияларды ауыстыруды қамтиды.
Жұмыс аяқталғаннан кейін вокзалдар заманауи күту залдарымен, жаңа тамақтану орындарымен, демалыс бөлмелерімен және сақтау камераларымен, сондай-ақ жолаушыларға арналған қосымша сервистермен жабдықталады. Ерекше қажеттіліктері бар адамдар үшін кедергісіз орта құруға ерекше назар аударылады.
Жолаушыларды тасымалдау бойынша қызметтерді тұрақты, тиімді және үздіксіз көрсету үшін вокзалдарда құрылыс-жөндеу жұмыстарын жүргізу уақытында билет кассаларын, күту залдарын және басқа да сервистік аймақтарды уақытша ауыстыру ұйымдастырылды. Сондай-ақ жолаушыларға қауіпсіз қызмет көрсетуді қамтамасыз ете отырып, объектілерді кезең-кезеңімен жабу көзделген.
Вокзал инфрақұрылымын жаңғырту жолаушылар сервисінің сапасын арттыруға, жайлылық пен қауіпсіздікті жақсартуға, сондай-ақ объектілердің өткізу қабілетін арттыруға мүмкіндік береді.