Тоқаев түркі мемлекеттерін Орта дәліз бойындағы инфрақұрылымды жаңғыртуға шақырды
Біздің елдер Еуразия құрлығының жүрегінде – Шығыс пен Батысты, Оңтүстік пен Солтүстікті байланыстыратын көптеген жолдардың тоғысында орналасқан. Бұл туралы Қазақстан Президенті Қасым-Жомарт Тоқаев Түркі мемлекеттері ұйымына мүше елдер басшыларының Габалада өткен XII саммитінде айтты, деп хабарлайды Rail-news.kz.
Мемлекет басшысының айтуынша, қазіргі таңда Қазақстан аумағы арқылы бес халықаралық теміржол дәлізі өтеді.
«Жуырда біз Достық – Мойынты теміржолының екінші желісін іске қостық. Бұл қадам Трансқазақстан теміржол дәлізінің қарқынды дамуына ықпал етеді. Жаңа бағыт жүк тасымалы көлемін бес есеге арттыруға мүмкіндік береді. Сонымен қатар тағы екі маңызды теміржол желісінің құрылысы жүріп жатыр. Күмән жоқ, бұл жобалар өңірлік логистиканың өсуіне жаңа серпін береді», – деді Президент.
Қазақстан басшысы Транскаспий халықаралық көлік бағытының Еуразия көлік жүйесінің стратегиялық бөлігіне айналғанын атап өтті.
«Соңғы бес жылда Орта дәліз арқылы тасымалданатын жүк көлемі алты есеге артты. Жақында Алматыда Түркі мемлекеттері ұйымына мүше елдердің көлік министрлері кездесіп, осы бағытқа қатысты бірқатар келісімдерге қол жеткізді. Біз түркі елдерін Орта дәліз бойындағы әуе хабтарының, теміржол станциялары мен теңіз порттарының инфрақұрылымын жаңғыртуға белсенді қатысуға шақырамыз.
Бүгінде көлік-транзит саласын цифрландыру бойынша белсенді жұмыс жүргізіліп жатыр. Бұл бағытта жасанды интеллект технологияларын қолдану сөзсіз тиімді болмақ. Сондықтан Түркі мемлекеттері ұйымы аясында жетекші сарапшылардың қатысуымен арнайы Цифрлық мониторинг орталығын құру мәселесін талқылауды ұсынамыз», – деді Президент.