Ақмая–Шиелі телімінде қызу жұмыс жүріп жатыр
Қызылорда облысы бойынша меншікті тілші
Сыр елінің теміржолшылары бүгінгі таңда күрделі жөндеудің жауапты кезеңін өткеріп жатыр. Қызылорда магистральдық желі бөлімшесінің оңтүстігіндегі үш учаскенің екеуі толық аяқталып, ендігі Ақмая-Шиелі телімінде рельс тізбектерін төсеу жұмыстары қарқын алған.
Бөлімше басшылығы назарында тұрған күрделі жөндеу жұмыстары бекітілген жоспарға сай жалғасуда. Алдағы екі толаскез кезеңінде 3 шақырымдық аумақтағы рельстік жаңарту мен жол төсемін нығайту жұмыстары тиянақталады деп күтілуде.
Жол табанын сүріп-тегістейтін ауыр техникалар: МПД, ПЛ, УК, ЭЛБ, ВПО секілді заманауи жол машиналары, қиыршық тас таситын төсеп-тегістейтін, жол табанын таптайтын жылжымалы құрам, рельс-шпал решеткаларын жеткізуші платформалар, 5 ауыр салмақты бульдозер, 2 автогрейдер, 5 автокөлік – бәрі де жол табанын жаңарту жұмысына жегілген. Құрылыс жұмыстарының басында 45 жол жөндеуші, 30-ға жуық механизатор, 6 орта буын жетекші мамандар еңбек майданында иық тіресе жұмыс атқаруда.
– «Integra Construction KZ» ЖШС-нің Батыс дирекциясы 2025 жылға арналған жоспар бойынша Қызылорда облысында 32,82487 км теміржолға күрделі жөндеу жұмыстарын жүргзуде. Қаракеткен мен Қараиірім станциялары арасында 5,5909 км,Төменарық станциясы мен Бөрітескен бекеті аралығында 8,9482 км, Екпінді бекеті мен Төменарық станциясы арасында 8,19 277 км жолға жаңа отандық релсь тізбектері төселді. Енді Шиелі станциясы мен Ақмая бекеті аралығында 10,093 км жол жаңартылып жатыр, – дейді мердігер мекеме басшысы Дәурен Сұлтамұратов.
Шиелі – Ақмая – Екпінді учаскесіндегі күрделі жөндеу қараша айының соңына дейін аяқталады деп жоспарлануда.