Ақтөбе-2 станциясы жаңғыртуды қажет етеді

Ақтөбе-2 станциясы жаңғырту жұмыстарын қажет етіп отыр. Бұл қадам темір жолдағы қозғалыс қауіпсіздігін сақтап, тиімділік пен өнімділікті арттыруға сеп болмақ. Ақтөбе-2 станциясы 2025 жылдың қаңтар-қазан айларында 10 982 пойыз қабылдап, 9 241 пойыз жөнелткен. Сұрыптау дөңесінен 131 217 вагон өткен.  

«Қазақстан темір жолы» ҰК» АҚ Ақтөбе магистральдық желі бөлімшесінің байланыс және электрмен жабдықтау бөлімінің бастығы Жәнібек Жұмаевтың айтуынша, 1 класты станцияны жаңғырту бағдарламасы бойынша бірінші кезекте сұрыптау жолдарын және бұрмаларды орталықтандыру қажет. Бұл жұмыс қозғалыс қауіпсіздігін арттыруға, техникалық ақауларды азайтуға және теміржол жүйесінің тиімділігін арттыруға мүмкіндік береді.  

– Ақтөбе-2 станциясын жаңғырту аясында бірқатар маңызды жұмыстар жоспарланған. Жаңғырту жұмыстарының экономикалық әсері де айтарлықтай болмақ. Жобаның жүзеге асуы транзиттік пойыздардың тоқтау уақытын қысқартуға, сондай-ақ вагондар мен пойыздарды жылдам өңдеуге мүмкіндік береді. Мысалы, Қандыағаш станциясында транзиттік пойызды өткізу кезінде Ақтөбе станциясында транзиттік вагондардың тоқтау уақытын 11,08 сағатқа қысқартады, – деді Жәнібек Жұмаев.  

Оның айтуынша, станциядағы 31 бұрманы орталықтандырғанда қозғалыс қауіпсіздігі артып, жұмыс тиімділігі күшейе түспек. Қазіргі уақытта бұрмалар көбінесе жергілікті басқару арқылы ауыстырылады, бұл адам факторының ықпалын азайтуға және техникалық ақауларды болдырмауға септігін тигізеді.

Сондай-ақ станцияның қабылдап-жөнелту жолдарын орталықтандыру жұмыстары да басталмақ. Жаңғырту станцияның жұмысын автоматтандырып, қозғалысты жылдамдатуға мүмкіндік береді. Әсіресе қабылдап-жөнелту жолдарына маневрлік сигналдар орнату, қозғалыс кезіндегі қауіпсіздікті қамтамасыз ету, маневрлік жұмыстың тиімділігін арттырып, қателіктердің алдын алуға мүмкіндік бермек.  

Инфрақұрылымдарды жаңалау кезінде Ақтөбе-2 станциясында орналасқан шағын қуатты төбенің жұмысы да жетілдіріледі. Бұл төбе қазіргі таңда қолмен басқарылып, вагондарды сұрыптау және тарату ісін жүзеге асырады. Оның автоматтандырылуы жұмыс үдерісін жылдамдатуға ықпал етеді.  

Ақтөбелік теміржолшылар Астанада өткен «Қозғалыс қауіпсіздігі мәдениеті» байқауынан осы жаңғырту жобасын ұсыну арқылы 2-орын алды. Бұл жай жоба емес, алда атқарылатын жұмыстар дейді теміржолшылар. Себебі Ақтөбе-2 станциясын жаңғырту теміржол инфрақұрылымының дамуына жаңа серпін береді. Бұрмаларды орталықтандыру, маневрлік сигналдарды орнату, қабылдап-жөнелту жолдарын электрлік орталықтандыру сияқты жаңғырту шаралары қозғалыс қауіпсіздігін жақсартып, станцияның жұмысын автоматтандырады.