Жетібай станциясы: мұнайдан басталған тарих
Маңғыстау ЖТ бөлімшесіне қарасты төртінші класты Жетібай станциясының тарихы өткен ғасырдың 60 жылдары киелі түбекте мұнай өндіріле бастаған кезеңнен бастау алады. Өзен – Маңғыстау теміржолының бойында орналасқан байырғы станция содан бері «қара алтын» мен газ өнімдерін болат жол арқылы тасымалдауды ұйымдастырып келеді.
Станция бастығы Дүйсенбай Бердімбетов былтыр ғана тағайындалса да, қолынан іс келетінін танытып үлгерген жастың бірі. Мысалы, оның басшылығымен одақ тарағалы жөндеу көрмеген станция ғимараты күрделі жөндеуден өтіпті. Ғимараттың шатыры жаңартылып, іші мен сыртына косметикалық жөндеу жүргізілген, қабырғалары қайта сыланып, линолеум төселіп, жаңа жиһаз алынған. Кабинеттерге керме төбелер жасалып, ғимараттың сыртқы ауласы цементтеліп, күрделі жөндеуден кейін тынысы ашылып, көркі келіскен кеңседе жұмыс жасаудың өзі көтеріңкі көңіл күй сыйлайтыныны жасырмайды станциялықтар. Бүгінде мұнда басшымен қоса 5 кезекші, 3 тауар кассирі, 3 жүк қабылдап, тапсырушы еңбек етеді.
– Осы жыл басынан бері Жетібай станциясына 60 вагон пойыз келіп, жүк түсірілсе, бізден 37 вагон жүк тиеліпті. Тиелетін жүктердің көбісі және негізгісі – шикі мұнай және мұнай қалдықтары, олар Ресейге бағытталады. Ал келетін жүктер мұнай құбырлары мен жем және құрылыс материалдары, – дейді станция бастығы.
Жақында көктемгі комиссиялық тексерумен Жетібайға соққан комииссия мүшелері бекеттің берекелі тірлігіне риза болған. Маңғыстау жүк тасымалы бөлімшесі директорының орынбасары Ерлан Бүркітов бар болғаны 15 адам еңбек ететін станцияда ауқымды істер тындырылғанын жеткізді.
– Бүкіл түбек темір жолының негізі осы Жетібай станциясынан басталады. 1961 жылы 5 шілдеде Жетібай кентіне жақын жерде алғашқы мұнай бұрқағы атқылаған болатын. Сөйтіп ұшқан құс, жыбырлаған жәндіктен басқа адам баласы тұрмайтын аптап өлке, маң далаға тіршілік бітіп, бұл жер өндірістік-стратегиялық аймаққа айналды. Үш жылдан кейін темір жол салынады. Мұнай мен темір жолдың арқасында Маңғыстау түбегінде қала мен жұмысшы поселкелері, теңіз жұмыс орындары, әуежайлар мен зауыттар және фабрикалар пайда болады. Станцияның бүгінгі басшысы Дүйсенбай Оспанұлының алғашқы аяқалысы көңілден шығып, бізді қуантып отыр,– дейді Ерлан Бүркітов.