Вокзалдағы ана мен бала бөлмесін пайдаланушылар қатары көбейген
Маңғыстау облысы бойынша меншікті тілші
Маңғыстау теміржол вокзалындағы ана мен бала бөлмесіне бас сұққан жан ол жерден ұядай жылылықты сезінері сөзсіз. Жып-жинақы бөлмедегі шағын төсек-орын, қабырғадағы суреттер, әртүрлі ойыншықтар бейне бір балалар өз бөлмесіне кіргендей әдемі әсер сыйлайды, деп хабарлайды Rail-news.kz.
Биыл бұл бөлменің қызметін пайдаланушылар қатары былтырғыдан көбейген. Жеті ай ішінде 42 ана балаларымен бірге қонақ болыпты. Оның үстіне ана мен бала бөлмесі қайта жөндеуден кейін кем-кетігі толықтырылып, әсем көрініске енген. Қабырғадағы мульткейіпкерлердің суреті мен еденге жаңа төселген кілемге дейін үйлесімді. Баланың киімін ауыстырып, жөргектейтін үстелмен қатар киім үтіктеуге арналған тақта қойылған. Кондиционер орнатылған. Төсек жабдықтары да түгелдей жаңартылып, түрлі ойыншықтар сатып алынған.
– Бөлме балалы әйелдердің барлық қажеттіліктерін ескере отырып жасақталды. Ол вокзалдың екінші қабатында орналасқан және тәулік бойы жұмыс істейді, барлық нәрсе стандартқа сай қарастырылған. Бөлмеде екі үлкен, бір балалар кереуеті, сәбилерге арналған үстел бар. Қысқатолқынды пеш, мұздатқыш, диспенсер, санитарлық-гигиеналық аймақ – бәрі жұмыс істеп тұр, – дейді Маңғыстау теміржол вокзалы бастығының орынбасары Гүлжан Мусилова.