ҚТЖ көмір тасымалдауда жақсы көрсеткішке жетіп отыр

«ҚТЖ» ҰК» АҚ көмір тасымалдауда жақсы көрсеткіштерге қол жеткізіп отыр. Осы жылдың 7 айының қорытындысы бойынша, соңғы үш айда компания 10% өсімді көрсетті. Бұл туралы «ҚТЖ - Жүк тасымалы» ЖШС-нің атқарушы директоры Нұржан Келбұғанов Орталық коммуникация қызметі алаңында өткен брифингте айтты, деп хабарлайды Rail-news.kz.

Оның айтуынша, халық үшін көмір тасымалдаудың осы көрсеткіші тамызда да сақталады.

«Бұл көрсеткішті жыл соңына дейін ұстап тұру маңызды болып тұр», – деді Н. Келбұғанов.

Көмірді тұрғындар үшін әлеуметтік маңызы бар жүк деп санайтын кәсіпорын, оны тасымалдау жұмыстарын алдын ала бастап кетті. Соған байланысты жылжымалы құрамды, локомотивтерді, инфрақұрылымды дайындау бойынша қажетті шаралар әзірленді. Жұмыс жоспарға сай жүргізілді. Бүгінгі таңда көмірді сапалы тасымалдауды қамтамасыз ету үшін барлық деңгейде жедел штабтар құрылдған. Оған қоса бақылау топтары жұмыс істеп жатыр.  

«Біздің басты мақсатымыз – осы көмір жеткізу тізбегіндегі барлық қатысушылардың жұмысын ұйымдастыру. Жұмыстың жақсы жолға қойылуы көмір өндіруші, трейдер, әкімдіктердің жұмысына, темір жол мен вагон иелері және тасымалдаушыларға байланысты. Осы күрделі тізбектің кез келген бір сатысында вагондардың кешігуі орын алса, ертең ол вагондардың бос тұрып қалуына және тапшылыққа әкелуі мүмкін», – дейді Нұржан Келбұғанов.

Жалпы, ҚТЖ әлеуметтік маңызы бар жүктерді жаппай тасымалдау маусымына дайын.