Президент Алматы мен Қонаев арасында электр пойызын қайта іске қосуды тапсырды
Қасым-Жомарт Тоқаев бүгін Алматы облысы тұрғындарымен кездесу барысында өңірдің көлік-логистика әлеуетін арттыру мәселесіне тоқталды, деп хабарлайды Rail-news.kz.
Президент облыстың көлік-логистика әлеуетін арттыру – басты басымдықтың бірі екенін атап өтті.
«Үкімет әкімдікпен бірлесіп, өңірдің көлік желісін жақсарту үшін кешенді шаралар әзірлеуге тиіс. Жолаушы және жүк тасымалының мүмкіндігін кеңейтуге жағдай жасау керек. Атап айтқанда, Алматы мен Қонаев қалаларының арасындағы автожолмен қатар теміржол желісін дамыту қажет», - деді Қасым-Жомарт Тоқаев.
Бұрын екі ортада арнайы электр пойызы қатынайтынын айтқан президент, соны қалпына келтіру мүмкіндігін қарастыру керек деген ойын жеткізді. Бұл шара Алматы маңындағы көлік кептелісін азайтуға септігін тигізбек.
«Алматы облысы Алматы шаһарының іргесінде және Қытай шекарасына жақын орналасқан. Мұнда аймақаралық көлік дәліздерін дамыту аса маңызды. Күре жолдар жүк және жолаушы тасымалының көлемін арттырады. Сондай-ақ, бір облыстың ғана емес, тұтас елдің дамуына септігін тигізеді», - деді президент.