Қазақстан көлік дәліздерін жаңартуға үлкен күш салуда
ҚР ИИДМ вице-министрі Алмаз Ыдырысов Брюссель (Бельгия) қаласында өткен Берлин Еуразиялық клубының 35-ші отырысына қатысты, онда Қазақстан, Германия, Бельгия, Швейцария, Франция елдерінің өкілдері болды, деп хабарлайды Rail-news.kz ИИДМ баспасөз қызметіне сілтеме жасап.
Алмаз Ыдырысов «Global Gateway – жаңа жағдайда бірлескен жобалар үшін мүмкіндіктер» тақырыбында өткен сессияда сөз сөйлеп, Еуразиялық клубтың қызметі Қазақстан мен Еуропалық Одақтың, Орталық Азия, Еуразияның арасындағы ынтымақтастықты ілгерілетуде маңыздылығын атап өтті.
Оның айтуынша, Қазақстан барлық аймақтың көліктік-транзиттік әлеуетін, көлік дәліздерін жаңартуға және халықаралық серіктестерімен өзара сауда-саттық инфрақұрылымын дамытуға үлкен күш салуда. Сәйкесінше, еліміздің Берлин еуразиялық клубының қатысушы елдер арасындағы өзара тиімді ынтымақтастығын құрудағы оңтайлы міндеттерін шешуге ықпал ететінін айтты.
Сондай-ақ, вице-министрдің Еуропалық Комиссияның халықаралық әріптестік жөніндегі бас дирекциясының Таяу Шығыс, Азия және Тынық мұхиты бойынша директоры Петерис Устубс пен Бельгия Корольдігінің көлік министрлігімен екіжақты кездесуі өтті.
Атап айту керек, Берлин еуразиялық клубы – азиялық және еуропалық серіктестер арасындағы диалогты, мәдениетті және құндылықтарды дамытуға бағытталған.