Алматыда мектеп оқушыларына темір жолдағы қауіпсіздік ережелері түсіндірілді
Алматы қаласындағы №50 және №83 мектепте теміржолда қауіпсіз жүріп-тұру ережелері бойынша дәрістер өткізілді. Алматы ЖТ, магистральдық желі және көлік полициясы бөлімшелерінің өкілдері балаларға темір жолдағы ойындардың қауіптілігі туралы айтып берді, деп хабарлайды Rail-news.kz.
2022 жылдың 9 айында Алматы өңірінің (Алматы-1, Алматы-2, Бұрындай, Шамалған, Байсерке, Қайрат станциялары) шекараларында локомотив бригадалары бөгде адамдардың темір жолға шығып кетуіне байланысты 132 рет шұғыл тежеуді қолданды. Бұл ретте, басудың 9 жағдайына жол берілсе, оның ішінде 5 жағдай өліммен аяқталды. Негізгі себеп – зардап шеккендердің қауіпсіздік шараларын сақтамауы. Жолды қысқарту үшін олар теміржол желілерін белгіленбеген жерлерде, жақындап қалған пойыздың алдынан кесіп өтпек болған. Жапа шеккендердің бірінен алкогольдік ішімдік ішкені, ал екіншісінде суицид фактісі анықталды.
Теміржолшылар пойыз жолында кенеттен пайда болған жаяу жүргіншіні басуды болдырмау мүмкін еместігін атап өтті. Жолаушылар құрамының қозғалыс жылдамдығы сағатына 140 км-ге жетеді, жүк пойыздары сағатына 110 км-ге дейін жүреді. Пойыз салмағы 7 мың тоннадан асады. Мұндай көрсеткіштермен пойыздың тежеу жолы 1 км-ге дейін жетеді.
Оқушыларды қауіпсіздік ережелерін сақтауға шақырып, теміржол нысандарында гаджеттерді, құлаққаптарды пайдаланбауға, вагон шатырларына шығып электр қуатына түсіп қалмауға, теміржол көпірлерінің металл конструкцияларына көтерілмеуге кеңес берді. Сондай-ақ, жасөспірімдерді қауіпті жерлерде әлеуметтік желілерге арналған бейнероликтер түсірмеуге шақырды.
Халықпен осындай алдын алу шараларына құрылған кездесулер бүкіл ел бойынша үнемі өткізіліп тұрады.