Екібастұз теміржолшылары қатаң режимде жұмыс істеп жатыр
Екібастұз теміржол торабында 37 нысан бар, оның 14-і ЖЭО апаттарынан қатты зардап шекті. Теміржол нысандарындағы қалпына келтіру жұмыстарын ҚТЖ бас инженері Батыр Котырев тексерді, деп хабарлайды Rail-news.kz.
Теміржолшылар стратегиялық нысандарды жұмыс режимінде сақтап отыр. Олардың ішінде локомотивтерге техникалық қызмет көрсету пункті, жетекші доңғалақ жұптарының тағақтығын болдырмау немесе азайту үшін локомотивтің жүрісіне қажетті құм дайындалатын, сақталатын және кептірілетін құм кептіргіш бар.
Теміржолшылар өз күштерімен объектілердің ішкі жылыту жүйелерін қалпына келтіруде. Қажетті материалдармен: құбырлармен, ысырмалармен жабдықтау мәселелері тез шешілуде.
Станция, депо, техкеңсе, билет кассаларының үй-жайларындағы температура 5-тен 12 градусқа дейін өзгеруде, сондықтан да қызметкерлер сыртқы киіммен жұмыс істеуге мәжбүр. Теміржолшылардың үйлері мен жұмыс орындарын жылыту үшін аймақ кәсіподағы 200-ден астам жылытқыш сатып алды.
Екібастұз станциясындағы үйлерді жылумен жабдықтауды қалпына келтіру кезінде жақын жерде тұратын тұрғындарды, қалпына келтіру бригадаларының қызметкерлерін, теміржолшылар мен полицейлерді жылытуға арналған төрт жылы вагон орнатылды. Мұнда жылынып, ыстық шай іше алады. Вагондар қатты отынмен, жуғыш және гигиеналық құралдармен, төсек-орын жабдықтарымен жабдықталған, ауыз сумен және азық-түлікпен қамтамасыз етілген.
