Құрық портына 6 жыл толды
6 желтоқсан күні Құрық портына 6 жыл толды. Құрық порты Каспий теңізінің шығыс жағалауында орналасқан Ақтау портының оңтүстігіндегі табиғи шығанақ. Ауа райы қолайлы болған соң мұнда жыл он екі ай тоқтаусыз автокөлік пен теміржол паромы жұмыс істейді.
Құрық порты – Н. Назарбаевтың стратегиялық бастамасы. Каспий теңізі арқылы батыс бағдарда экспорттық әлеуетті күшейту үшін паром қызметін қолдану туралы 2014 жылғы 11 қарашадағы «Нұрлы жол –Болашаққа бастар жол» атты президент Жолдауында айтылды. Қазақстанды ірі іскерлік, транзиттік, өңірлік хабқа айналдыруда теміржол көлігі мен теңіз инфрақұрылымының маңызы өте зор.
2015 жылы сәуірде Құрық портындағы өткізу кешені нысандарының құрылысы басталды. 2016 жылы 6 желтоқсанда Мемлекет басшысының қатысуымен өткізілген Жалпыұлттық телекөпір кезінде порттың алғашқы өткізу кешені мен теміржол жолы іске қосылды.
17 қаңтар 2018 жылы «Порт Құрық» ЖШС «Транскаспий халықаралық көлік маршруты» Халықаралық қауымдастығының мүшесі болды.
Порт облыс орталығы Ақтау қаласынан 90 шақырым қашықтықта орналасқан.
Ең жақын елді мекен – Құрық – 17 км.
Құрық порты паром кешені еліміздің халықаралық көлік дәліздерімен қосатын логистикалық тізбек құрамына жатады. Сол арқылы жүк жеткізу мерзімін барынша азайтып, тасымалдау үдерісін жеңілдетіп, тауар бағасын арзандатады. Құрық портының паром кешені еліміздің экспорттық және транзиттік әлеуетін, көлік дәлізінің бәсекелестігін дамытып, мультимодальдық тасымалдауды өсіреді. Қазақстанның инфрақұрылымын Еуразиялық халықаралық сауда ағынына қосады.