Астанада пойыздар қозғалысын басқару орталығы ашылды
«ҚТЖ» ҰК» АҚ орталық кеңсесінде солтүстік өңір бойынша Пойыздар қозғалысын басқарудың өңірлік орталығы ашылды. Салтанатты шараға «ҚТЖ» ҰК» АҚ Басқарма төрағасының орынбасары Қанат Әлмағамбетов және «Қазпрофтранс» ҚБ Орталық кеңесінің төрағасы Оразғали Ахметбаев қатысты, деп хабарлайды Rail-news.kz.
Жаңа орталық солтүстік өңірдің төрт бөлімшесі – Ақмола, Қарағанды, Қостанай және Павлодар шекараларында пойыздар қозғалысын басқару функциясын біріктірді.
- Бұл ең жүктемесі жоғары бағыттар. Компанияның негізгі тиеу үлесі осы бөлімшелерде жүзеге асырылады. Сондықтан да осы орталық диспетчерлерінің жұмысына бүкіл желінің жұмыс көрсеткіштері байланысты, - деп атап өтті Қанат Әлмағамбетов.
Тасымалдау процесін басқаруды орталықтандыру станциялардың өткізу қабілетін арттыруға ықпал етіп, пайдалану шығындарын оңтайландыруға, қозғалыс қауіпсіздігін, транзиттік пойыздардың маршруттық жылдамдығын арттыруға, сондай-ақ локомотивтер мен вагондарға қызмет көрсетуге мүмкіндік береді.
Өңір бойынша пойыздық жағдайды орталықтандырылған бақылау инновациялық технологияларды енгізудің арқасында автоматты режимде жүзеге асырылады. Жобаны іске асыру шеңберінде магистральдық желінің барлық учаскелері «ҚТЖ» ҰК» АҚ мамандары әзірлеген диспетчерлеудің заманауи жүйесімен қамтылған. Желілік-аппараттық залдарда байланыс жабдықтары жаңғыртылып, жылжымалы құрамды бақылаудың және техникалық құжаттаманы жүргізудің автоматтандырылған жүйелері енгізілді.
Солтүстік өңірдің Пойыздар қозғалысын басқарудың өңірлік орталығын орналастыру үшін компанияның орталық әкімшілік ғимаратында жеке блок бөлініп, диспетчерлер үшін тиісті еңбек және демалыс жағдайлары жасалған. Солтүстік өңірдің РПБО-да жұмыс істеу үшін елордаға 137 қызметкер келді. Оларға екі жыл ішінде тұрғын үйді жалға алу немесе Астанада тұрғын үйге ипотекалық қарыз төлеу бойынша шығыстар өтелетін болады. Жұмыскерге бір жалақы және отбасының әрбір мүшесіне 25% мөлшерінде көшу кезінде қаржылық көмек көрсетіледі. Багажды тасымалдау бойынша шығыстар өтеледі.
«Пойыздар қозғалысын басқару орталығы» инновациялық жобасын «ҚТЖ» ҰК» АҚ-ның автоматика, телемеханика және телекоммуникация департаменті 2018 жылдан бастап іске асырып келеді. Бүгінгі таңда Ақтөбе мен Алматыда Пойыздар қозғалысын басқарудың өңірлік орталықтары табысты жұмыс істеуде.