ҚТЖ-да «Никотинге – витамин» акциясы өтті
«Қазақстан теміржолшысы» газетінің тілшісі
1 наурыз күні «ҚТЖ» ҰК» АҚ-да «Никотинге – витамин» акциясы өтіп, оған теміржолшылар белсенді қатысты. Темекілерін әкеп тапсырған теміржол саласының қызметкерлеріне хош иісі бұрқыраған қып-қызыл алмалар таратылды. Аталған акция биыл бесінші рет өтіп отыр, деп хабарлайды Rail-news.kz.
Акцияға қатысушылар алдында сөз сөйлеген «ҚТЖ» ҰК» АҚ аппарат жетекшісі Серік Кеулімжаев пен Орталық ардагерлер кеңесі төрағасының орынбасары Асқар Сәрсембеков Компания қызметкерлерін шылымнан бас тартып, салауатты өмір салтын қалыптастыруға шақырды.
– «Никотинге – витамин» акциясының түпкі мақсаты, сіздерді салауатты өмір салтын ұстануға, бұл қағиданы балаларыңызға да насихаттауға бағытталып отыр. Денсаулық – зор байлық. Сондықтан денсаулықты күтіп, спортты серік еткен жөн. ҚТЖ – салауатты өмір салтын, ауызбіршілікті ұстанатын компания. Солай болып қала бермек. Баршаңызға мықты денсаулық, жемісті еңбек тілеймін, спортты серік етуге шақырамын, – деді Серік Кеулімжаев.
Өз кезегінде Асқар Боранқұлұлы да пайдасынан зияны көп темекінің тек жаман әдет екенін, ерік-жігері бар адамдар үшін одан арылудың түк те қиыны жоқ екенін жеткізді.
Бұдан кейін акцияға қатысушылар Әлеуметтік саясат департаменті қызметкерлерінің қолдауымен ырғақты әуен жетегінде жаттығу жасап, өн-бойларын бір сілкіп алды. Жалпы мұндай игілікті шараның көңіл-күйді көтеріп, денсаулық туралы бір сәт ойлануға мұрсат беретіні сөзсіз деп өзара пікір бөлісті акцияға қатысушылар.