Өткел кезекшісі автокөлік пен пойыздың соқтығысуының алдын алды
Ақтөбе магистральдық бөлімшесінің жол дистанциясындағы өткел кезекшісі Аслан Хасанов жақындап қалған пойыздың жолын бөгейтін белгі қойып, сол арқылы пойыздың автокөлікпен соқтығысуына жол бермеді, деп хабарлайды Rail-news.kz.
Соңы қайғылы жағдаймен аяқталуы мүмкін оқиға Ақтөбе-2 станциясының күзетілетін өткелінде болған.
«Бұл оқиға кешкілік уақытта нағыз автокөліктер нөпірі көп болатын кезде болды. Тура өткелде екі жеңіл автокөлік соғылып қалды. Пойыз жақындап келе жатқанын көрсетіп қанша рет белгі берсем де оған көлік жүргізушілері назар аудармады. Жолды босатып, оларды екі жаққа таратуға барынша талпынсам да одан түк шықпады, - дейді Аслан Хасанов.
Осы уақытта теміржол өткелі жолын жүк көлігінің де кесіп өткелі тұрғаны жағдайды одан сайын ушықтырды. Қауіптің қаншалықты үлкен екенін түсінген Аслан Хасанов келе жатқан пойыз құрамын тоқтату үшін жолды бөгеу белгісін қосуға шешім қабылдайды. Ол өзінің әрбір іс әрекетін станция кезекшісіне айтып отырған, ал кезекші келе жатқан пойыз машинисімен байланысқа шықты. Осылайша теміржолшының жедел әрекетінің арқасында өткелде болуы мүмкін үлкен апатқа жол берілмеді.
Аслан Хасановтың теміржолда жұмыс істеп келе жатқанына 27 жыл болған, соның 25 жылында ол жол монтері болып еңбек етті. Әріптестері оны өз ісіне жауапты, білгір әрі еңбекқор жұмыскер деп бағалайды.
«ҚТЖ» ҰК"АҚ - «Магистральдық желі дирекциясы» филиалы басшылығы Аслан Хасановты сыйақыға ұсынды.