«Жас темір»: Екінші ротация қорытындыланды

Өткен жұма күні Ұлттық компанияда «Жас темір» дамыту бағдарламасына қатысушы жас мамандардың 2-ші ротациясын қорытындылаған кездесу өтті. Жиынға бағдарламада топ жарып, жеңімпаз атанған бес жас маман қатысты.

Компанияның Адами ресурстарды басқару департаментінің директоры Сәуле Истлеева бастаған сала мамандары бағдарламаға қатысушы жас мамандар Аян Шарапат, Мадияр Жадыгеров, Елдар Ахметбеков, Әйгерім Шымырбаева мен Арыстан Жұманның жұмысына қатысты өз бағаларын берді.  

Бірінші болып сөз алған Әйгерім Шымырбаеваның жоғары оқу орнынан алып шыққан негізгі мамандығы – теміржол көлігіндегі маркетинг жөніндегі маман екен. Бірінші ротация бойынша ол «ҚТЖ-Жүк тасымалы» ЖШС Маркетинг және сервистерді дамыту департаментінде менеджер ретінде тағылымдамадан өтсе, 2-ші ротация бойынша Жоспарларды әзірлеу және көрсеткіштерді қалыптастыру департаментінің менеджері қызметін атқарған.  

– Мен аталған департаментте күнделікті пайдалану көрсеткіштерінің тәуліктік динамикасына қатысты жұмысты, күнделікті вагондардың жұмыс паркі көрсеткіштерін талдау, жылжымалы құрам пайдалану тиімділігін мониторингтеу және талдау, Documentolog, «Оперативтік штаб» мағлұмат беру, жүк түрлерін тиеу, жүк айналымын, тасымалдаудан түскен табыс, Қазақстандағы ірі өндірушілермен жұмыс істеу сияқты қызметтерді атқардым. Менің ҚТЖ компаниясына қандай пайдам тиді дейтін болсам, Департаментте әр қызметкерге жүктелетін жұмыс көлемін азайттым, оперативті штабқа қажетті шұғыл ақпараттарды әзірлеуге көмектестім, Тәуліктік көрсеткіштердің динамикасы диаграммалырын құрастырдым, Excel программасы мүмкіндіктерін пайдалану арқылы вагон паркі көрсеткіштерін есептеуді оңтайландырдым, – дейді Әйгерім.  

«Жас темір» дамыту бағдарламасының 2-ші ротациясын табысты тәмамдаған төрт жігіт те өздерінің атқарған жұмыстарын тап-тұйнақтай етіп дайындап келген слайдтары арқылы таныстырды. Елдар Ахметбеков 1-ші ротация барысында Ақмола ЖТ бөлімшесіне қарасты Қырқыншы станциясында тауар кассирі жұмысынан бастаса, 2-ші ротация кезінде алдымен «ҚТЖ-Жүк тасымалы» ЖШС-де Тиеу және түсіруді ұйымдастыру департаментінің менеджері, кейін Қостанай ЖТ бөлімшесінде кірме жолдар бөлімі инженерінің көмекшісі, логистика және тасымалды ұйымдастыру менеджері қызметтерін атқарған. Аян Шарапат, Мадияр Жәдігеров пен Арыстан Жұман да 2-ротация барысында Компаниядағы жұмыстары мен жинаған тәжірибелері туралы егжей-тегжейлі баяндады.  

Жиынды қорытындылай келе, Сауле Истлеева жас мамандарға 3-ші ротацияны табысты аяқтап, қоржындарын қажетті ілім-білім, тәжірибемен толықтырып шығуларына тілектестік білдірді.  

– Биыл жыл соңында бағдарламаның жаңа нұсқасын іске қосуды жоспарлап отырмыз. Жаңа нұсқаның тұжырымдамасын әзірлеу барысында сіздердің екінші және алда өткелі отырған үшінші ротация барысында жинаған тәжірибелеріңіз, жұмыс барысында жолыққан кедергілер, қиындықтар, бағдарламада бұрын ескерілмей қалған ньюанстар көрініс табуы керек. Үшінші ротация жұмысын қорытындылауда сіздер өз ұсыныстарыңызды енгізген концепция дайындап әкелесіздер. Бұл сіздердің өз дерекнамаларыңыз болады. «Міне, бізде осындай қатып қалған стандарттарды бұза білетін жас мамандар бар» деп біз оларды бағдарламаға қатысушы келесі топқа таныстырып, үлгі ететін боламыз, – деді Сәуле Истлеева.