Теміржолшылар күні құтты болсын!

Жылдағы дәстүр бойынша тамыздың алғашқы жексенбісі аталып өтетін Көлік қызметкерлері күні еліміздегі жүз мыңдаған теміржолшылардың да төл мерекесі болып табылады. Бұл – уақытпен санаспай еңбек етіп, тәуліктің кез келген мезгілінде жұмыс орнынан табылатын теміржолшы деген жанкешті халықтың ерен еңбегі еленіп, лайықты бағасын алатын күн.

Олар – пойыздардың қозғалыс қауіпсіздігін қамтамасыз етіп, жыл он екі ай түзде жүретін жолшылар, машинистер, пойыз құрастырушылар, вагон қараушылар, жолсеріктер, тағысын тағы теміржолдың кәсіби мамандары.  

Жылдағы дәстүрге сай биыл да кәсібилігімен танылып, адал еңбегімен абырой арттырған бір топ сала еңбеккерлері түрлі наградаларға ие болады. Атап айтсақ, «Құрметті теміржолшы» белгісімен 76 адам, «Үздік басшы» белгісімен 45 адам, «Адал еңбегі үшін» төсбелгісімен 97 адам, «Кәсібі бойынша үздік» наградасымен 173 адам, «ҚТЖ» ҰК» АҚ Басқарма төрағасының Құрмет грамотасымен және Алғыс хатымен 700-ден астам адам марапатталады.  

Сонымен қатар биыл «Үздік мамандар» Құрмет тақтасына Ұлттық компанияның, еншілес ұйымдардың және басқа да мекемелердің «Құрметті теміржолшы» белгісімен, Компанияның Басқарма төрағасының атаулы сағатымен, «Адал еңбегі үшін», «Қозғалыс қауіпсіздігі үшін» және «Үздік рационалиазатор» төсбелгілерімен, сондай-ақ мемлекеттік наградалармен, «Үздік басшы», «Кәсібі бойынша үздік», «Үздік маман» белгілерімен марапатталғандар, қала берді теміржол көлігінің дамуына сүбелі үлес қосқан, қызметтік міндеттерін атқару барысында айрықша батылдық, қырағылық танытқан 48 теміржолшының портреті орналастырылмақ.  

Мереке құтты болсын, құрметті теміржолшылар! Суретте саланың ең мәртебелі марапаты «Құрметті теміржолшы» белгісіне ұсынылған «ҚТЖ-Жүк тасымалы» ЖШС «Батыс» филиалы Никельтау станциясының пойыз құрастырушысы Марат Арыстанбаев.