Сезімге сыйлық
Атырау облысы бойынша меншікті тілші
Жыл сайын Ұлттық компанияның ұйымдастыруымен теміржолшылардың балалары арасында сурет салудан байқау өтеді. «Балауса болашақ» байқауына биыл атыраулық Сезім Мейрамғали да өзі салған суреттерді жолдаған болатын.
Балаларды қорғау күніне орай өтетін байқау қорытындысымен Сезім жүздеген балалар арасында жүлделі 3-ші орын иеленгені белгілі болды. Түрлі себептермен жүлдесі кешігіп, осы кезге дейін Сезімге жетпеген болатын. Атырау жүк тасымалы бөлімшесінің бастығы Аслан Базарғалиев биылғы теміржолшылар күніне арналған жиында кішкентай суретшіге жүлдесін табыс етіп, әдемі гүлдесте сыйлады.
– Қызым жеті жаста, сабақты жақсы оқиды, ынтасы жоғары. Ол сурет салғанды ұнатады. Биылғы байқауға еркін тақырыптағы суретімен қатысты. Қызымның жүлделі орын алғаны мен үшін үлкен бақыт, – дейді анасы Жанат Берішбаева. Кішкентай Сезімнің қуанышында шек жоқ. «Қуантсаң баланы қуант» деген осы.