Alstom Вьетнамда метро пойыздарын шығара бастайды
Француздың Alstom компаниясы Вьетнамда метро пойыздарын өндіруді жергіліктендірмек. Бұл жөніндегі келісім француз өндірушісі мен Ханой метрополитенінің бас мердігері, Vingroup құрамындағы Vinhomes компаниясы арасында жасалды, деп хабарлайды Rail-news.kz.
Келісімге сәйкес, Вьетнам астанасы үшін Metropolis платформасында жасалған бес вагонды 200 метро пойызы шығарылады.
Жобаның алғашқы кезеңінде Alstom 83 пойызды Франциядағы Валансьен-Петит-Форе зауытында өндіреді. Ал екінші кезеңде Vingroup компаниясы Alstom лицензиясы бойынша тағы 117 құрамды Вьетнамда шығармақ.
Alstom жергілікті өндіріске қажетті технологияларды, инженерлік-техникалық сараптаманы, өндірістік жабдықтарды және негізгі компоненттерді ұсынады.
Жаңа пойыздардың корпусы алюминийден жасалады. Олар рекуперативті және дискілі тежеу жүйелерімен жабдықталады. Сонымен қатар құрамдар GoA4 деңгейіндегі толық автоматты, машинистсіз режимде жұмыс істейді.
Бұл әріптестік Ханойда қалалық рельсті көлік желісін жедел кеңейту жоспарымен тұспа-тұс келіп отыр. Қаланың бас жоспарына сәйкес, 2045 жылға қарай Ханойда жалпы ұзындығы 979 шақырым болатын 18 метро желісін қалыптастыру көзделген.
Қазір Ханойда екі метро желісі жұмыс істейді. Солардың біріне Alstom бұған дейін 10 төрт вагонды пойыз жеткізген. Компания сонымен қатар аталған желіге сигнал беру және электрмен жабдықтау жүйелерін орнатқан.
Vingroup жаңа пойыздар қай өндірістік алаңда құрастырылатынын әзірге жариялаған жоқ.
Айта кетейік, Вьетнам билігі қаңтар айында елдің ұлттық теміржол операторы VNR-ға жылжымалы құрам шығаратын ірі өндірістік кешен салуды тапсырған. Ол үшін Ханой маңынан 250 гектар жер бөлінген.
Вьетнамда теміржол техникасын өндіруді жергіліктендіруге оңтүстіккореялық Hyundai Rotem де ниетті. Компания биыл жергілікті THACO кәсіпорнымен жылжымалы құрам шығаратын өндіріс орнын салу және технологияларды беру жөнінде келісім жасаған.