Үздік станция кезекшісі зейнетке шықты
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесіне қарасты Талас станциясының ұжымы салада ұзақ жыл адал еңбек еткен станция кезекшісі Әлімжан Бақбердиевті құрметпен зейнет демалысына шығарып салды.
Бөлімше директорының орынбасары Нұрлан Байзақов, кәсіподақ ұйымының төрағасы Данияр Меңдыбаев, «Тараз-Түрксіб» учаскесінің бастығы Жәнібек Жанысбеков салтанатты іс-шараға арнайы келіп, салада ұзақ жыл еңбек еткен тәжірибелі маманды құттықтап, иығына шапан жауып, құрмет көрсетті.
– «Жамбыл магистральдық желі бөлімшесі» филиалы басшылығының атынан аймақ темір жолының дамуына өлшеусіз үлес қосқан 42 жылдық адал еңбегіңізге алғыс білдіремін. Әріптестеріңіздің көрсетіп жатқан құрметі – сіздің кәсібилігіңіз бен табандылығыңызға берілген шынайы баға, – деген Нұрлан Дастанұлы Әлімжан Әбдуалыұлына филиал директорының арнайы Құттықтау хатын тапсырды.
Темір жолдағы еңбек жолын 1984 жылы Бурыл станциясында бастаған Әлімжан Бақбердиев станция кезекшісі, кейіннен сұрыптау дөңесінің кезекшісі болып 10 жыл жұмыс істеп, «Мамандығы бойынша үздік» белгісімен марапатталған. Содан кейін алты жыл аймақтағы ең ірі кластан тыс Тараз станциясында парк кезекшісі болып тәжірибесін шыңдаған маман Талас станциясына 2000 жылы ауысып келіпті.
– Туған жерім – Байзақ ауданындағы Ақшолақ станциясы. Шойын жолдың бойында, теміржолшылар әулетінде өскен жастың таңдауы басқа болуы мүмкін бе? Бұрынғы Алматы теміржол техникумын тәмамдап, 42 жыл бойы осы салада еңбек еттім. Көпбалалы отбасындағы жеті қыздан басқа үш ұл түгелдей әке жолын жалғадық, – дейді ол.
Еңбек жолын станция кезекшісі болып бастап, осы қызметтен зейнетке шыққан маман бірнеше рет компания басшысының Құрмет грамотасы мен Алғыс хатымен марапатталған.
– Станция кезекшісінің жұмысын жетік білетін маман. Алдыңғы екі ұжымды айтпағанда, Талас станциясының өзінде табан аудармай 26 жыл еңбек етті. Тұрақтылық пен табандылық – теміржолшыға керек қасиеттер. Екеуі де Әлімжан Әбдуалыұлының бойында бар. Сонысымен әріптестеріне үлгі болып, үздік атанып келеді, – дейді Талас станциясының бастығы Тілектес Байдаулетов.
