Транскаспийді дамыту талқыланды
«Қазақстан теміржолшысы» газетінің тілшісі
Қазақстан мен Әзірбайжан ынтымақтастығы жаңа деңгейге көтерілді. Оған екі ел басшыларының келіссөздері ықпал етті. Бакудегі халықаралық қатынастарды талдау орталығында өткен дөңгелек үстелде Қазақстан Президентінің Жолдауы талқыланды.
Жиынға қатысушылар оның нақты мақсаттармен ерекшеленетінін атап өтті. Ғылыми орталық төрағасы Баку мен Астананың ортақ бір міндеті Транскаспий бағытын дамыту екенін жеткізді. Былтыр екі ел арасындағы тауар айналымы 40 пайызға артып, 500 миллион долларға жуықтаған.
– Бүгін Әзірбайжанның жетекші аналитикалық орталығында біз осы елдің алдыңғы қатарлы сарапшыларымен, саясаттанушыларымен, экономистерімен бірге Мемлекет басшысының Жолдауын талқыладық. Талқылау барысында бұл Жолдаудың тек Қазақстан үшін ғана емес, аймақ үшін де маңыздылығы айтылды. Себебі Жолдауда аймақтық мәселелер де қозғалған. Соның ішінде Әзірбайжан үшін маңыздысы – көлік-логистика саласындағы ынтымақтастық, Орта дәліздің әрі қарай дамытылуы, – дейді Қазақстанның Әзірбайжандағы Төтенше және Өкілетті елшісі Әлім Байел.
Ал Халықаралық қатынастарды талдау орталығы басқармасының төрағасы Фарид Шафиевтің айтуынша, Әзірбайжанды Қазақстанның көлік, логистика, Каспий арқылы байланысты нығайтуға көп көңіл бөліп жатқаны қуантады. Әсіресе Транскаспий бағыты арқылы Орта дәлізді нығайтуға бірлесіп күш салу қажет.