Соңғы 3 жылда еліміздің пойыздарында 11 сәби дүниеге келген
«Жолаушылар тасымалы» АҚ соңғы үш жыл ішінде пойыздарда дүниеге келген сәбилер туралы мәлімет жариялады, деп хабарлайды Rail-news.kz сайты ҚазАқпарат агенттігіне сілтеме жасап.
«2021 жылдан 2024 жылға дейін пойыз ішінде 11 сәби дүниеге келді. Ондай сәтте жолсеріктер, жылжымалы құрам қызметкерлері, пойыз бастықтары босануға тікелей қатысады»,- деп жауап берді компанияның баспасөз қызметі.
Ақпаратта айтылғандай, пойыз бригадасының қызметкерлері қажет болған жағдайда алғашқы көмек көрсетеді және олар арнайы курстан өткен.
Айта кетейік, биыл 9 қаңтарда ақтөбелік келіншектің «Алматы-Ақтөбе» бағытындағы пойызда босанғаны туралы хабарлаған едік.
«Мен балам үшін қатты қорықтым. Алайда пойыз қызметкерлері маған осындай жағдайда көмек көрсетіп, жанымнан кетпей, аман-есен босануыма септігін тигізді. Бұл күн біздің отбасымыз үшін естен кетпес сәттердің біріне айналды. Енді қызым есейген кезде бұл ерекше оқиғаны айтатын боламыз», - деді жас ана Айнагүл Тілеубергенова.
Ата-анасы дүние есігін ашқан нәрестенің есімін Малика деп қойған.