Балалар 7-15 жасқа дейін балалар билетімен жүреді. Пойызда балаларды тасымалдау ережесі
Жазғы демалыс басталысымен көптеген ата-аналар балаларымен пойыздарда саяхатқа шығады. «Жолаушылар тасымалы» АҚ пойыздарда балаларды тасымалдау ережелері туралы еске салады.
Ата-аналарға 7 жастан аспаған бір баланы тегін тасымалдауға рұқсат етіледі. Жеке орын алу үшін балалар билетін сатып алу қажет. Егер 7 жастан аспаған бірнеше баласы бар отбасы саяхаттаса, онда бір ересек адам тек бір баланы тегін алып жүре алады, ал қалған балаларға балалар билеті сатып алынады.
7 жастан 15 жасқа дейінгі балалар балалар билетімен жүруге рұқсат етіледі. Балалар билетінің құны ересектерге арналған билет құнының 50%-ын құрайды.
15 жастан асқан балаларға ересек билеті сатып алынады. Бұл жастағы балалар ересек адамның еріп жүруінсіз, бірақ олардың заңды өкілінің нотариалды куәландырылған жазбаша келісімімен өз бетінше саяхаттай алады.
Жазғы демалыс кезінде көптеген ата-аналар өз балаларын пойызбен жазғы лагерлерге жібереді. 15 жасқа дейінгі ұйымдастырылған балалар топтарын тасымалдау үшін арнайы ережелер бар. Әр 10 балаға бір ересек және бүкіл топқа бір медициналық қызметкер еріп жүруі керек. Кәмелетке толмаған балаларды сүйемелдеу үшін ересек жолаушы балалардың ата-аналарынан нотариалды куәландырылған сенімхат алуы керек. Бұл шаралар саяхат барысында жас жолаушылардың қауіпсіздігі мен жайлылығын қамтамасыз ету үшін қажет.
Мемлекетаралық тасымалдар үшін келесі ережелер қолданылады: 5 жасқа дейінгі балаларға тегін жүруге рұқсат етіледі; 5 жастан 10 жасқа дейінгі балалар балалар билеттері бойынша саяхаттайды; 10 жастан 15 жасқа дейінгі балалар Қазақстан ішінде толық билет құнының 50%-ын төлейді, ал басқа мемлекеттер аумағында толық тариф бойынша жүреді.
Егер бала ата-аналарымен саяхаттаса, билет сатып алу және пойызға отыру кезінде баланың туу туралы куәлігі немесе паспорты ұсынылуы тиіс. Егер бала заңды өкілсіз бөгде адаммен саяхаттаса, ересек жолаушы пойызға отыру кезінде ата-аналардың екеуінен де нотариалды куәландырылған рұқсат көрсету қажет.
Ұлттық тасымалдаушы қауіпсіздік ережелерін сақтауды және балалардың әрқашан ересектердің бақылауында болуын ұсынады.