ҚТЖ-да пойыздар қозғалысының қауіпсіздік көрсеткіші жақсарды
Осы жылдың 8 айында өткен жылдың сәйкес кезеңімен салыстырғанда ҚТЖ бойынша қозғалыс қауіпсіздігі деңгейінің нысаналы көрсеткіші 11% жақсарып, ереже бұзушылықтар саны 13%-ға азайды.Көбінесе қатерлер жөндеу кәсіпорындарының, жылжымалы құрам жеке иелерінің және басқа тасымалдаушылардың кінәсінен болған, деп хабарлайды Rail-news.kz.
Пойыз қозғалысы қауіпсіздігіне сыртқы себептер әсер етті. Олардың ішінде қауіптілігі жоғары аймақта бөгде адамдардың болуы, қараусыз жайылған мал, автокөлік құралдары жүргізушілерінің теміржол өткелдерін кесіп өту ережелерін бұзуы.
Осы жылдың 8 айында ревизорлық аппаратымен технологиялық процестердің сақталуына, жылжымалы құрам мен техникалық құралдардың ұсталуы мен пайдаланылуына 7 мыңнан астам тексеру жүргізілді. 73 мың бұзушылық анықталып, олар жедел жойылды. Жылжымалы құрамды және сенімділігі төмен инфрақұрылым құрылғыларын пайдалануды тоқтату бойынша 10 мыңға жуық тыйым салу шаралары қабылданды.
ҚТЖ-да пойыздар қозғалысының қауіпсіздігін басқару жүйесін жақсарту үшін Жамбыл және Қарағанды станцияларының шекараларында орналасқан кәсіпорындарды тексерген аудиторлар тобы жұмыс істейді.
Жылжымалы құрамды жөндеу және сервистік қызмет көрсету бойынша қызметтердің сапасын арттыру үшін ҚТЖ компанияға қызмет көрсететін жөндеу кәсіпорындарында 200-ден астам тексеру жүргізді. Ауқымды аудиттен кейін жекелеген цехтардың жұмысы тоқтатылғанға дейін қатаң шаралар қабылданды.
Жеке тармақ иелері мен өнеркәсіптік кәсіпорындардың кірме жолдарындағы қозғалыс қауіпсіздігінің жағдайы әлі де алаңдатады. Жыл басынан бері мұнда 127 вагон мен локомотив рельстен шығып кетті. Жағдайды жақсарту үшін ҚТЖ уәкілетті мемлекеттік органмен бірлесіп, жеке тармақ иеленушілермен, ҚР теміржол тармақ иеленушілері қауымдастығы өкілдерімен кездесулер өткізеді, онда кірме жолдардағы қозғалыс қауіпсіздігін қамтамасыз етуге жәрдемдесу мәселесі қаралды.
ҚТЖ магистральдық желідегі қозғалыс қауіпсіздігі талаптарын қатаңдату үшін теміржол көлігіндегі қозғалыс қауіпсіздігінің бұзылуын тергеу қағидаларына және теміржол көлігіндегі қауіпсіздік қағидаларына өзгерістер енгізуге бастамашылық жасады. Көлік полициясы департаментімен бірлесіп пойыздар қозғалысын жедел қалпына келтіру бойынша өзара іс-қимыл алгоритмі іске асырылуда.
ҚТЖ-да қозғалыс қауіпсіздігінің жай-күйіне талдау жүргізілді. Талдау нәтижелері қозғалыс қауіпсіздігін және кадрлық әлеуетті басқару жүйесін жетілдіруге, инфрақұрылым құрылғылары мен жылжымалы құрамның сенімділігін арттыруға бағытталған "Пойыздар қозғалысы қауіпсіздігінің жай-күйін жақсарту жөніндегі жүйелі шаралар кешеніне" енгізілген.
2024 жылдың бірінші жартыжылдығының қорытындысы бойынша Қазақстанның теміржол әкімшілігі қозғалыс қауіпсіздігінің жай-күйін жақсартқан жетекші ұйымдардың қатарына кірді және ТМД елдері арасында қозғалыс қауіпсіздігі көрсеткіші бойынша екінші орында тұр.