Африкадағы Бисау порты мен Транскаспий көлік дәлізін ұштастыру қарастырылуда
Жуырда Батыс Африкадағы Бисау порты мен Транскаспий дәлізі ұштасуы мүмкін. Бұл туралы Қазақстанға ресми сапармен келген Гвинея-Бисау Президенті Умару Сисоку Эмбалоның ел президенті Қасым-Жомарт Тоқаевпен кездесуі барысында айтылды, деп хабарлайды Rail-news.kz.
Осылайша Қазақстан тауарлары ашық мұхитқа шыға алады. Екі елдің билігі бұл мәселені зерделеуге келісті.
Тараптар ауыл шаруашылығы, көлік-логистика, тау-кен металлургиясы, қаржы, цифрландыру және телекоммуникациялық технологиялар сияқты перспективті салаларда ықпалдастық орнату мәселелерін қарастырды.
«Көлік-логистика саласының әлеуетін толық пайдалануға екі ел де мүдделі. Осы ретте Батыс Африкадағы Бисау порты мен Транскаспий көлік дәлізін ұштастыру жолдарын зерделеуге келістік. Әлемдегі геосаяси ахуал мен азық-түлік қауіпсіздігі мәселесі ушығып тұрған қазіргі кезде мұның мән-маңызы айрықша», - деп атап өтті Қ.Тоқаев.
Гвинея-Бисау экономикасы ауыл шаруашылығына негізделген. Күріш, мақта, жержаңғақ өнімдерін өндіреді. Балық аулау ісі де дамыған. Бірақ Африкадағы серіктестеріміздің жер ресурсы шектеулі. Қазақстан сияқты кең байтақ далаға иелік етпейді. Тиісінше біздің тарап қажетті дәнді дақылды экспорттай алады.