Қазақстан мен Тәжікстан транзиттік мүмкіндіктерді дамытуға келісті
Астанада «Қазақстан темір жолы» ҰК» АҚ Басқарма төрағасы Талғат Алдыбергеновтың «Роҳи оҳани Тоҷикистон» МУК бастығы Комил Мирзоалимен кездесуі Тәжікстан Республикасының Қазақстан Республикасындағы Төтенше және Өкілетті Елшісі Хайрулло Ибодзоданың және ТР Үкіметі жанындағы Мемлекеттік материалдық резервтер жөніндегі агенттік директоры Нұрмахмад Ахмадзоданың қатысуымен өтті, деп хабарлайды Rail-news.kz.
Тараптар теміржол көлігі саласындағы екіжақты ынтымақтастықты дамытуды талқылады. Қазақстан мен Тәжікстан арасында жүк тасымалдау көлемін ұлғайту мүмкіндігі қарастырылды.
"ҚТЖ "ҰК" АҚ және «Роҳи оҳани Тоҷикистон» МУК басшылығы елдер арасындағы теміржол қатынасын дамытуға бағытталған әріптестік қатынастарды нығайтуға және бірлескен жобаларды іске асыруға өзара мүдделілігін растады.
Атап айтқанда, екі елдің қатысуымен жүктерді тасымалдау көлемі; ресейлік мұнай өнімдерін Қазақстан аумағы арқылы Тәжікстанға тасымалдау; қазақстандық алюминий тотығын экспорттау; пековоздар және басқа да мәселелер талқыланды.
Қазақстан мен Тәжікстан аумақтары бойынша жүктерді темір жол көлігімен тасымалдаудың оң динамикасы атап өтілді. 2025 жылғы 7 ай қорытындысы бойынша тасымалдардың жалпы көлемі 3,1 млн тоннадан асып, өткен жылдың сәйкес кезеңімен салыстырғанда 15% артты. Ресейден Қазақстан аумағы арқылы Тәжікстанға мұнай өнімдерін тасымалдау транзиті 713,1 мың тоннаны құрады (2024 жылға қарағанда 33% өсті). Сондай-ақ, аталған кезеңде Тәжікстанға қазақстандық астық тасымалының 38,8% айтарлықтай өсуі байқалды.
Кездесу қорытындысы бойынша тараптар "ҚТЖ "ҰК" АҚ мен «Роҳи оҳани Тоҷикистон» МУК арасындағы екіжақты кездесу хаттамасына қол қойып, көлік әлеуетін дамыту және үздіксіз тасымалдауды қамтамасыз ету мақсатында тығыз ынтымақтастықты нығайтуға, сондай-ақ екі елдің транзиттік мүмкіндіктерін кеңейту үшін берік негіз құруға дайын екендіктерін білдірді.