ҚТЖ мен РЖД стратегиялық ынтымақтастық бойынша басым бағыттарды айқындап алды
Владивосток қаласында (РФ) «ҚТЖ» ҰК» АҚ мен «РЖД» ААҚ стратегиялық ынтымақтастық жөніндегі бірлескен жұмыс тобының XVI отырысы өтті, деп хабарлайды Rail-news.kz.
Тараптар теміржол көлігі саласындағы екіжақты ынтымақтастық шеңберінде, оның ішінде түйіспелердегі жағдай және локомотивтер мен локомотив бригадаларының жұмысын ұйымдастыру, электрондық жүкқұжаттар бойынша тасымалдау көлемін ұлғайту туралы мәселелерді қарады.
2025 жылдың 8 айында ҚР мен РФ арасындағы тасымалдау көлемі 58,3 млн. тоннаны құрап, өткен жылдың сәйкес кезеңімен салыстырғанда 3,2% немесе 1,8 млн.тоннаға ұлғайды, оның ішінде Қазақстаннан Ресейге/Ресей арқылы экспорттық жүк ағыны 35,3 млн. тоннаны құрап, 6,8% немесе 2,2 млн тоннаға артты.
Атап айтқанда, ҚР-дан РФ арқылы көмір экспорты 8 млн.тоннаны құрап, 36,4% немесе 2,1 млн. тоннаға өсті, РФ арқылы астық тасымалы 1,5 млн. тоннаны құрап, 5,3 есеге немесе 1,2 млн. тоннағажұлғайды.
Екі елдің темір жолдары делегациясының басшылары Мемлекетаралық түйісу пункттерінің (МАТП) тиімділігін арттыру жөніндегі 2026-2030 жылдарға арналған іс-шаралар жоспарын бекітті. Жоспарда жүк ағынының ұлғаюын ескере отырып, түйіспелерді жедел дамыту үшін бірлескен қадамдар мен мерзімдер тіркелген.
Сондай-ақ, тараптар ағымдағы жылдың соңына дейін қол қоюға жоспарланып отырған 2030 жылға дейін МАТП-ны дамыту және «Солтүстік-Оңтүстік» ХТД-ның шығыс бағытын дамыту туралы келісімдердің мәтіндерін талқылады.
Отырыс қорытындысы бойынша хаттамаға қол қойылды. Тараптар стратегиялық ынтымақтастық жөніндегі жұмыс тобының келесі отырысын Қазақстанда 2026 жылдың I-ші жартысында өткізуге уағдаласты.