ҚТЖ мен AD Ports Group ынтымақтастық перспективаларын талқылады
2025 жылғы 2 қазанда Астанада «Қазақстан темір жолы» ұлттық компаниясы» АҚ (ҚТЖ) мен AD Ports Group (ADPG) арасында кездесу өтті. Кездесу барысында тараптар қазіргі өзара іс-қимыл мәселелерін және көлік логистикасы саласындағы болашақтағы ынтымақтастық бағыттарын талқылады, деп хабарлайды Rail-news.kz.
Кездесуде мультимодальды тасымалдарды дамыту және Карачи портындағы ынтымақтастық мүмкіндіктеріне ерекше назар аударылды. Бұл портта AD Ports Group Шығыс айлақта ұзақмерзімді концессия иесі болып табылады және заманауи терминалдарды басқарады. Бұл бағыт маршруттарды әртараптандыру мен халықаралық жеткізу тізбектерінің тұрақтылығын арттыру үшін маңызды буын ретінде қарастырылады.
Кездесу барысында Қазақстанның Шығыс–Батыс және Солтүстік–Оңтүстік халықаралық көлік дәліздерінің тоғысқан жерінде стратегиялық орналасқаны атап өтілді. ҚТЖ мен AD Ports Group-тың бірлескен бастамалары елдің транзиттік әлеуетін нығайтуға, маршруттар географиясын кеңейтуге және тұрақты жеткізу тізбектерін дамытуға бағытталған.
Анықтама үшін: AD Ports Group — Азия, Таяу Шығыс пен Еуропа арасындағы сауда және көлік байланыстарын дамыту жобаларын жүзеге асыратын, әлем бойынша 25-тен астам порт пен терминалды басқаратын, Біріккен Араб Әмірліктерінің жетекші порттық және логистикалық компаниясы.
Келіссөздер қорытындысы бойынша тараптар Қазақстан мен Біріккен Араб Әмірліктерінің қатысуымен тұрақты көлік дәліздерін қалыптастыру бағытында ынтымақтастықты дамыту ниетін растады.