ҚТЖ ҚХР мен Өзбекстан теміржол әкімшіліктерімен пойыздарды қабылдауды арттыру бойынша келіссөздер жүргізуде
2025 жылдың қазан-қараша айларында Қазақстан – Қытай түйіспе пункттерінде ҚХР тарапынан пойыздарды қабылдаудың төмендеуі байқалды. Себебі – Үрімші мен Бейжіңдегі астық жүктерінен сынама алу және зертханалық талдаумен ұзақ тексеру рәсімдері (5 - 10 тәулік). Қазір пойыздар шоғырлануының өсуіне жол бермеу үшін ҚХР-ға құрамдарды жөнелту Қытай тарапының қабылдаудың нақты мүмкіндіктерімен келісілген тәуліктік жүктеме шеңберінде жүргізілуде, деп хабарлайды Rail-news.kz.
Астықтың маусымдық экспортының 70% Орталық Азия елдеріне, оның ішінде Өзбекстанға едәуір көлемде тиесілі. Өзбек темір жолының өткізу қабілеті кіретін жүк ағындарынан едәуір төмен, бұл құрамдардың жиналып қалуына әкелді.
Бұдан басқа, өткен маркетингтік жылы алыс шетелге астық экспорты кезінде көлік шығыстарын субсидиялауға 40 млрд теңге (тоннасына 20-30 мың теңге өтемақы) бағытталды. Ағымдағы жылы субсидиялар қолданылмайды, бұл Орталық Азия мен ҚХР елдеріне жеткізілімдердің қысқа бағыттарға қайта бағдарлануына әкелді. Бұл жекелеген шекара өткелдеріне және көрші елдердің инфрақұрылымына жүктемені күшейтті. Субсидиялауды қайта бастау экспорттық ағындардың бір бөлігін қайта бөлуге, ҚХР мен Өзбекстанмен түйісулерге қысымды төмендетуге және астықтың неғұрлым біркелкі әкетілуін қамтамасыз етуге мүмкіндік береді.
ҚТЖ-да астық тасымалдаушылар мен жабық вагондардың қажетті паркі жұмылдырылған, қажет болған жағдайда қосымша жылжымалы құрам тартылады. Мемлекеттік органдар мен бизнестің қатысуымен жағдайдың күнделікті мониторингін жүзеге асыратын Астық штабы жұмыс істейді. ҚХР және Өзбекстан темір жолдарымен пойыздарды қабылдауды арттыру, тексеру рәсімдерін жеделдету және түйіспелердегі жүктемені түсіру бойынша келіссөздер жүргізілуде.
Маркетингтік 2025-2026 жылдары ішінде (қыркүйек — 20 қараша) 3,8 млн тонна астық (+18%) тасымалданды, оның ішінде: 900 мың тонна – ішкі нарыққа (+32%), 2,9 млн тонна – экспортқа (+14%). Орталық Азия елдеріне экспорт 1,8 млн тоннаны (+24%) құрады, оның 1,3 млн тоннасы — Өзбекстанға (+34%).