ҚТЖ және ТТЖ ынтымақтастықты дамытады
Тәжікстан Республикасына жұмыс сапары аясында «Қазақстан темір жолы» ҰК» АҚ Басқарма төрағасы Талғат Алдыбергенов «Рохи охани Точикистон» МУК бастығы Комил Мирзоалимен кездесу өткізді, деп хабарлайды Rail-news.kz.
Келіссөздер барысында тараптар негізгі көрсеткіштердің айтарлықтай өскенін атап өтті. 2025 жылдың қорытындысы бойынша елдер арасындағы тасымалдардың жалпы көлемі 15,1% артып, 5,9 млн тоннаны құрады. Соның ішінде Қазақстаннан Тәжікстанға экспорт 7,6 пайызға өсіп, 2,6 млн тоннаға жетті – бұл астық, ұн, мұнай өнімдері, қара металдар, түсті кен, өсімдік майы және т. б.
Теміржол әкімшіліктерінің басшылары теміржол маршруттарының бәсекеге қабілеттілігін арттыру, өңірдегі сауда-экономикалық байланыстарды нығайту, логистикалық процестерді одан әрі интеграциялау, құжаттаманы цифрландыру және Орталық Азияны әлемдік нарықтармен байланыстыратын көлік дәліздерін бірлесіп дамыту жөніндегі жұмысты жалғастыруға келісті.
«Қазақстан темір жолы» ҰК» АҚ мен «Рохи охани Точикистон» МУК арасындағы ынтымақтастық көпжылдық әріптестік қатынастарға негізделіп, Қазақстан мен Тәжікстан арасындағы үздіксіз көлік қатынасын қамтамасыз етуге бағытталғаны атап өтілді. Кездесу қорытындысы бойынша 2025 жылғы жұмыс қорытындылары және 2026 жылға арналған жоспарлар туралы екіжақты хаттамаға қол қойылды.
Сондай-ақ, ҚР Сыртқы істер министрінің Тәжікстан мемлекетінің басшысымен кездесуі аясында «Қазақстан темір жолы» ҰК» АҚ Басқарма төрағасы ТР Премьер-министрінің бірінші орынбасары Холикзода Хаким Хикматулломен және осы елдің Сыртқы істер министрі Сироджиддин Мухриддинмен кездесті. Келіссөздер барысында тараптар халықаралық ынтымақтастықты нығайтудың негізгі аспектілерін егжей-тегжейлі талқылап, екі мемлекеттің транзиттік-логистикалық әлеуетін дамытудың стратегиялық бағыттарын айқындады. Қазақстан мен Тәжікстан арасындағы экономикалық өзара іс-қимылға қуатты серпін беруге арналған тиімді көлік дәліздерін құруға және жүк тасымалдау көлемін ұлғайтуға ерекше назар аударылды.
