ҚТЖ экологиялық міндеттемелері аясында Алматы облысында 100 мыңнан астам ағаш отырғызады

Алматы облысында экологиялық міндеттемелерге сәйкес 100 мыңнан астам ағашты өтемдік отырғызу жұмысы жалғасып жатыр, деп хабарлайды Rail-news.kz.

Бастама Алматы станциясының торабын айналып өтетін жаңа теміржол желісі жобасы аясында іске асырылуда. Бұл жұмыс ҚТЖ-ның «Таза Қазақстан» жалпыұлттық экологиялық акциясына қатысуының маңызды бөлігі және еліміздің табиғат қорғау заңнамасына сәйкес өңірдің экожүйесін толық қалпына келтіруге бағытталған.

Компания экологиялық міндеттемелер аясында Алматы облысында 100 мыңнан астам ағаш отырғызып, елімізді ауқымды көгалдандыруға және экологиялық мәдениетті қалыптастыруға елеулі үлес қосады.

Көшет отырғызу жұмыстары биылғы жылдың 15 наурызында басталды. Аралық нәтижелерге тоқталсақ: Іле ауданы Ақши ауылы маңында 16 мың түп ағаш, ал Талғар ауданы Нұра ауылы аумағында тағы 8 мыңнан астам көшет отырғызылды.

Мамандандырылған ұйым агротехникалық нормалар мен экологиялық қауіпсіздік талаптарын қатаң сақтай отырып, жұмыстарды орындайды.

   «ҚТЖ» ҰК» АҚ үшін мұндай жобаларды іске асыру ірі инфрақұрылымдық жобаларды салу кезіндегі әлеуметтік жауапкершілік және орнықты даму стратегиясының ажырамас бөлігі. Ауқымды жасыл қордың құрылуы шаңды азайтуға, ауа сапасын жақсартуға, топырақты нығайтуға және қолайлы микроклиматтың қалыптасуына ықпал етеді.  

Жоба жоспарлы режимде іске асырылуда. Отырғызудың барлық кезеңдерін аяқтау Алматы облысының экологиялық тұрақтылығын едәуір күшейтуге мүмкіндік береді.