Орта Азияда теңдесі жоқ кешен

Жаңалықтар

08.12.2017, 11:47

Елбасының қатысуымен өткен жалпыұлттық телкөпірде «Оңтүстік» көліктік-логистикалық аймағындағы «Continental Logistics – Шымкент» ЖШС ашылды. Құрылысы бірнеше жылдан бері жүргізіліп жатқан көліктік-логистикалық орталықтың тұсауы кесілуі – бүкіл оңтүстік өңір көптен күткен қуанышты оқиға еді. Салтанатты шарада А+ класына жататын аталған кешендегі қоймалар іске қосылды. Жалпы аумағы 35 гектарға созылған қоймалардың көлемі 24,7 шаршы метрді құрайды. Құрғақ және климатты қоймалардан бөлек мұнда контейнерлі алаң, терминал, кедендік бақылау бекеті орналасқан. Онда әртүрлі қадағалаушы органдар келіп, «бір терезе» қағидасымен барлық қызмет түрін көрсетеді. – Біз Шымкент қаласында мультимодальды көлік-логистикалық орталығының құрылысын аяқтадық. Оның жүк өткізу қабілеті жылына 1 млн тонна. Біздің орталық Шығыс – Батыс, Оңтүстік – Солтүстік ағынына қызмет ететін кеден аймағы мен толық сервистік желісі қамтылған заманауи кешен, – деп мәлімет берген «ҚТЖ» ҰК» АҚ вице-президенті Санжар Елубаев, Елбасыдан инфрақұрылымдық жобаны іске қосуға рұқсат сұрады. Жаңа нысан әуежай, теміржол және автожолдың түйісер тұсында орналасқан. Сондықтан тауарлар үш бағытта тасымалданады. Құрғақ және климатты қоймаларға автокөліктермен қап-қап тауарлар әкелініп жатыр. Екі қойманың арғы қақпасынан теміржол төселген. Қойма жетекшісі Асылбек Құлтаевтың айтуынша, вагонмен келген жүк түсірілген соң, бергі жағынан тікелей автокөліктерге тиеледі. Келген көліктің затты тиеу мүмкіндігіне сай мұндағы қойма есіктері де ыңғайлы салынған. Қоймадағы жұмыс жүйесі ВМС жүйесінде жұмыс істейді. Ол дегеніміз – бүкіл қазақстандық тауар тасумен айналысатын компаниялар осы базаны қарап, тауарларының қалдықтарын, қандай тапсырыс түскенін онлайн режимінде бақылай алады. Мұндай заманауи кешен әзірге Орта Азияда жоқ көрінеді. – Құрғақ қоймада температуралық режимді қажет етпейтін тауарлар сақталынса, климаттысында үш тоңазытқыш, бес әмбебап және үш көкөніс сақтайтын камера бар. Әрқайсысына мың тоннадан асатын тауар сияды. Тауарлар голландиялық технологияның нұсқасымен жасалған жәшіктерге салынған соң, бес қатарға жиналады. Әр жәшікте 1000 кг дейін өнім сыймақ. Алғаш болып Тәжікстаннан айына 600 вагонмен келетін тауарды біздің қойма арқылы өткізуді жоспарладық. Ол тауарлар вагонмен қоймаға келіп, автокөліктерге тиеліп, Ресей асады. Құрғақ қоймада 15500, климатикалық қоймада 3300 тонна жеміс-жидек, көкөніс сақтауға болады. Қосымша -24 градустағы салқында 6600 тоннаға дейін басқа да салқындатылған өнімдер жиналмақ, – деп ақпарат берген Асылбек Түймебекұлы, сондай-ақ, көкөністерді, тропикалық жемістерді сақтайтын үш қойма мен салқындатылған тауар яғни колбаса, сыр, иогурт сынды өнімдерді сақтайтын камераның ерекшелігі ауаны сорып алып, ішінен азот газын бөлетінін, сонда тропикалық жемістердің сақталу мерзімі ұзаққа созылатынын, ал картоп, пияз, капуста, қияр, қызанақ өнімдерін сақтайтын екінші әмбебап камералар – 180 және +6 градусқа дейін жұмыс жасайтынын да тәптіштей түсіндірді. Көрші Өзбекстаннан картоп, пияз өнімдерін тасымалдайтын кәсіпкер қазірдің өзінде жүгін әкеле бастапты. Базарда баға көтеріліп, тұрақсыздық орын алғанда өнімін шығармақ. Климатты қоймада қазір 30 тонна пияз болса, бірер күнде тағы 200 тонна пияз келеді екен, сосын олар қанша уақыт тұрса да бұзылмайтын жекелеген жәшіктерше салынып қойылатын көрінеді. Қойма басшысы әзірге екі қоймада 80-ге жуық маман еңбек ететінін, клиенттер саны артып, жұмыс 2-3 ауысым көшкенде олардың саны жүзге жетуі мүмкін екенін жеткізді.

Орта Азияда теңдесі жоқ кешен

Басқа да жаңалықтар

Қазақстан теміржолшысы газеті, №16 03 наурыз 2026 жыл