Жолшылар әулетінің өкілі

Жаңалықтар

08.12.2017, 14:59

Оқуға 2 мин

Семей өңірінде сан-салалы теміржолда бір ғана кәсіп – жол шаруашылығына маманданған династия бар. Ол – іргесі Түрксіб дәуірінде қаланған Суықбұлақ станциясынан өрбіген Мамырбаевтар әулеті. Жаңа-Семей жол дистанциясының директоры Мұрат Мамырбаев осы әулеттің жарқын бір өкілі. Суықбұлақ станциясында жолшы болған әкесінің жанында жүріп жол шаруашылығының бар шаруасына бүге-шігесіне дейін бала кезден қанып өскен отбасының бар баласы «ұяда көргенін ұшқанда ілгені» анық. Алматыдағы теміржол институтын тәмамдап келген 1985 жылдан бастап Мұрат Несіпқамитұлы табан аудармастан Жаңа-Семей жол дистанцияда еңбек етіп келеді. Осы аралықта тек бірнеше жыл бойы Семей магистральдық желі бөлімшесі басшысының орынбасары қызметін атқарғаны бар. Әйтсе де бүгінде 35 жылға айналған еңбек өтілінде өзінің жігерлі жастық шағын арнаған Жаңа-Семей жол дистанциясына қайта оралып, абыройға толы еңбек жолын әрі қарай жалғастыруда. –Жол шаруашылығында «ең үздік ревизор – қыс» деген нақыл сөз бар. Ал, басшы ретінде «алдағы қыс өткен қыстан да қаһарлы болады» деген болжамды берік ұстанамын. Сондықтан биылғы қысқа даярлықты былтырдан да күшейттік. Нәтижесінде жол шаруашылығындағы барлық әкімшілік және өндірістік нысандар 100 пайыз әзірленді. Бұрмалар басын қардан аршитын жұмыс күші де даярланды. Отын қоры толық. Қысқа алаңсыз кірдік, – дейді телім бойын күніне бір мәрте сүзіп шығатын дистанция бастығы. Жарма мен Жаңа-Семей арасындағы жалпы ұзындығы 239 шақырымды құрайтын бір бағытты бас жолды күнде қарап шығу оңай емес. Әйтсе де, дистанция басшысы үйреншікті әдетімен осынау телім бойын, ондағы барлық нысанды толық қарап шығуға шектеулі мерзім ішінде уақыт табады. Содан болар, оның қатарға жаңадан қабылданған әрбір жолшы мен жол шеберлерінің, барша бригадирлердің аты-жөнін жаңылмай айтатын ерекше есте сақтау қабілеті жолшыларды таңырқатады екен. Жол шаруашылығының қат-қабат тіршілігін жақсы білетін Мұрат Несіпқамитұлы теміржолшылар қажеттілігін басты орынға қояды. Басқасын былай қойғанда Шар – Жаңғызтөбе – Жарма арасындағы шағын станциялардағы жолшылар қосынына мерзімдік басылымдарды жөнелтуді қадағалауды да күнделікті қызметтік міндеттерінің қатарына қосқан. Өздерін өмірлік тәжірибесі мол маманның шәкірттері сайтын көмекшілері – дистанцияның бас инженері Қанат Абдуғалиев, орынбасарлары Қайрат Мұстафинов пен Рахат Абдуллиндер де қауырт қызметте басшының кәсіби дағдыларына сүйенеді. Айтпақшы тағы бір шәкірті бүгінде Суықбұлақ станциясында еңбек етіп жүрген жол шебері, Құрметті теміржолшы, інісі Рахат Мамырбаев десек болады. Міне, әке аманатына, жол қызметіне деген адалдық.

Жолшылар әулетінің өкілі

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл