Ерекше ауысымға түседі

Жаңалықтар

05.01.2018, 11:17

Жылнаманың жаңа парағы – Жаңа жылды желтоқсанның 31 күні түнгі ауысымға түсетін Семей ЖТ бөлімшесінің диспетчерлік орталығының мамандары өзге ешбір мекемеде орын алмайтын ерекше көңіл күймен қарсы алуды жоспарлап отыр. Бөлімше жүрегі саналатын диспетчерлік орталықтың шұғыл шаруашылық басқару бөлімінің жетекші инженері Зульфия Тәуірбекқызы жұмыс орындарында қарсы алатын жыл сайынғы, дәстүрлі түрдегі жаңа жыл кешінің биыл да айрықша көңілді өтетініне сенімді. Осынау күні ауысымда бес пойыз диспетчері, бір-бірден кезекші мен оператор және бір локомотив диспетчері жұмыс орнында болады. Аталмыш орталық қызметінің жауапкершілігі, жұмыс ырғағы тым күрделі, өте ауыр. Сондықтан да, бір ауық бой жазып, көңіл сергіту мұнда жазылмаған заң. Қалыптасқан дағдыға сай бұл күні тәтті де дәмді мол дастархан жайылады. Оған бірінші кезекте аппараттағы қыз-келіншектер жауапты. Бір көк-сок әкелсе, бірі манты, бірі қазы-қартасын пісіріп әкеліп, дастархан жаңа жыл кеші өтетін көңілді орындардан еш айырмасы болмайды десе де болғандай. Сондықтан жаңа жылда ауысымға түсу тіпті талас екен. Сағат тілі түнгі 12-ні көрсетіп, жыл парағы ауысқан сәтте орталыққа ең алғашқы «қонақтар» келе бастайды. Атап айтсақ, бөлімшеде түнгі жұмыста отырған НЖС-пен ЭЧ мен ШЧ диспетчерлері, АСУ бөлімінің операторы құттықтап келеді. Құттықтау демекші диспетчерлік аппарат осы түні ыстық лебіздердің ортасына айналады. Ең алдымен орталық қызметкерлеріне радио байланыс арқылы жолаушылар мен жүк пойыздарының машинистері ізгі тілектерін жолдайды екен. «Жол жүріп келе жатқан локомотив бригадаларының жүрекжарды тілектеріне «халал тост» көтереміз», – деп әзілдейді орталық диспетчерлері. Одан соң шалғайдағы шағын станциялар мен жол айрықтарындағы станция кезекшілерінің, ШЧ байланысшыларының лебіздері жетеді екен. – Жай күндері жұмыс барысымен қызметтік тұрғыда тіл қатысып, ақ жол тілеп қана жүретін машинистерге біз де құттықтау жолдап, көңілдерін көтереміз, – дейді пойыз диспечері Ерболат Сәкенов. Осы орайда айта кету ләзім, тәулік сайын жөнелтілетін немесе бөлімшенің ірі станцияларында құрастырылатын жылжымалы құрамдарды қадағалау бұл түні де қалтқысыз жүргізіледі. Яғни, жаңа жыл кешін диспетчерлер қауымы мәселен, Семей мен Дегелеңнен аттандырылған жүк пойыздарын Ақтоғай мен Локоть сынды түйіспелі станцияларға қабылдап алуға береді. Сонымен қатар жылжымалы құрамдарды жүріс кестесінен кідіртпеу, транзиттік пойыздарды қабылдап алу мен жөнелту де күн тәртібінен түспейді екен.

Ерекше ауысымға түседі

Басқа да жаңалықтар

Қазақстан теміржолшысы газеті, №32-33 28 сәуір 2026 жыл