Армандар орындалады

Жаңалықтар

05.01.2018, 11:47

«Қазақстан темір жолы» компаниясы жаңа жыл қарсаңында Астана қаласындағы 35 мүмкіндігі шектеулі балаға қайырымдылық шарасын жасады. Бұл шара – балалар арманын орындаған жоба десе де болады. Себебі желтоқсан айында ұлттық компанияның «ҚТЖ» ҰК» АҚ әлеуметтік жобалар қорының ұйымдастыруымен бас ғимаратта «Тілектер шыршасы» құрылып, оған осындай балалардың арман-тілектері жазылған хаттар ілу сұралған болатын. Міне, сол армандар шыршасына «Астана қалалық мүгедек балалар қоғамы» қоғамдық бірлестігінде тіркеуде тұрған отыздан астам баладан түрлі тілектер келіп түсті. Оған бей-жай қарамағанм компания қызметкерлері әр баланың қалаған затын алып беруге тырысты. Сыйлықтарды кеше аталған қордың және компанияның өзге де қызметкерлері Мүгедек балалар қоғамына келіп, оларға өз қолдарымен табыстады. –Бүгін міне, «Тілектер шыршасы» акциясын қорытындыладық. Балалардың тілектері – сан алуан ойыншықтар, әр түрлі тілдегі кітаптар, өзге де сыйлықтар екен. Сол жазғандары бойынша барлық сыйлықтарды алдық. Осындай балалардан бас тартпай, қаншама төзіммен, шыдаммен, махаббатпен соларды бағып отырған ата-аналар алдында бас июміз керек. Олар - ерекше құрметке лайық жандар, сол себепті теңіздің тамшысындай ғана болса да көмегімізді беріп жатырмыз, - дейді «ҚТЖ» ҰК» АҚ әлеуметтік жобалар қорының директоры Ербол Кеңгірбаев. Астана қаласында 20 жылдан бері осындай мүмкіндігі шектеулі балалардың ата-аналарының бастамасымен мемлекет тарапынан қолдау тауып құрылған «Астана қалалық мүгедек балалар қоғамы» қоғамдық бірлестігінің директоры Қамқа Жасанованың айтуынша, бұл бірлестікте барлығы 130-дай мүмкіндігі шектеулі бала бар. Олардың 110-ы үй жағдайында ем алады және 8 түрлі арнаулы әлеуметтік қызмет көрсетіледі. Ал ұлттық компания бұл бірлестік құрылғалы бері көмек жасап келеді екен. –Қалай құрылдық, солай біз теміржолшылардың қолдауын, қамқорлығын сезініп келеміз. Ол үшін алғысымыз шексіз. Бұлар - қамкөңіл жандар, өзім де сондай баланың анасымын. Олар жылап, еңіреп келгенде бекем болыңдар, бұл Алланың берген сынағы деп жұбатамыз, қордың қызмет ету шеңберінде барлық көмегімізді көрсетеміз. Осындай ата-аналардың жанына жалау болып, көмек қолын соза білетін теміржолшыларға мың да бір рахмет, - деген бірлестік басшысы «ҚТЖ» ҰК» АҚ әлеуметтік жобалар қорының директоры Ербол Кеңгірбаевты Алғыс хатпен марапаттап балалардың қолынан шыққан символикалық тұмар тарту етті.

Армандар орындалады

Басқа да жаңалықтар

Қазақстан теміржолшысы газеті, №65 18 тамыз 2026 жыл