Алғыс алған Алтынай

Жаңалықтар

05.01.2018, 12:09

Алматы қаласында туып-өскен Алтынай теміржолшылар отбасында тәрбиеленеді. Бала кезден «Құрметті теміржолшы» деген атағы бар атасын үлгі тұтып өскен бойжеткен, әрине мамандық таңдауда қателескен жоқ. М.Тынышпаев атындағы Көлік академиясына оқуға түсіп қызыл дипломмен тәмамдайды. Тек қана оқып қана қоймай ғылымға да көңіл бөлген бойжеткен, түрлі басылымдарға ғылыми мақалалар жазып, халықаралық ғылыми-тәжірибелік конференцияларда баяндама жасайды. Білімін арттыру мақсатында магистратурада оқып, оны да үздік аяқтайды. Қос дипломын құшақтап Алатаудан Арқаға қоныс аударады. Ең алғаш еңбек жолын «Қазақстан темір жолы» ҰК» АҚ» – «Магистральдық желі дирекциясы» филиалы Еңбек қауіпсіздігі және экология басқармасында бастайды. Сауатты да, жауапты кадрды бағалай білген басшылық 2014 жылы «Қазақстан темір жолы» ҰК» АҚ «Магистральдық желі дирекциясы» филиалының Техникалық басқармасына менеджер етіп тағайындайды. Осылай, қабілетін шыңдап, қоғамдық жұмыстарға да белсене атсалысып, Ұлттық компанияның бір кірпіші болып қаланып келе жатқан Алтынай жыл сайын дәстүрлі түрде өтетін республикалық форумның да жандануына үлес қосқаны үшін жаңа жыл қарсаңында басшылық тарапынан Алғыс хат алды. –Біз осы жылды жемісті қорытындыладық. Биыл еліміз үшін мерейлі жыл болды. Халықаралық көрмені де ойдағыдай өткіздік. Дәстүрлы форум да нәтижелі болды. Бүгінгідей марапаттар бізді одан сайын қанаттандырады. Алдағы жылда да жұмысымыз жемісті болып, компаниямыз өркендей береді деп үміттенемін, баршаларыңызға Жаңа жыл құтты болсын, – дейді Алтынай Жатқанбаева.

Алғыс алған Алтынай

Басқа да жаңалықтар

Қазақстан теміржолшысы газеті, №65 18 тамыз 2026 жыл