Шығыста үскірік аяз...

Жаңалықтар

16.01.2018, 10:28

Оқуға 2 мин

Ел шығысындағы теміржолшылар ауа температурасының күрт төмендеуіне байланысты қауырт жұмыс қимылына көшті. Әйтсе де, күнделікті қызмет барысын ырғақтан шығарып жіберерліктей өзекті мәселелер туындаған жоқ. Бөлімше басшысының бірінші орынбасары Ғабит Есқожановтың мәлімдеуінше, өткен аптада өңірдегі ауа температурасы кей жерлерде -37 градусқа дейін төмендеген, бүгінгі таңда да бірқатар аймақтарда үскірік аяздың беті қайтқан жоқ. –Туындаған табиғи ахуалға байланысты қозғалыс қауіпсіздігін сақтау мақсатында қырағылық, сақтық шаралары біршама арттырылды. Әйтсе де, теміржолшылар аузында «қыс шілдесі» аталып кеткен аязды күндер сала мамандарына кедергі туғыза қойған жоқ. Ал, Астана – Риддер бағытындағы Тальго пойызына байланысты туындаған жайтқа бірінші кезекте техникалық жайт себеп болды деп болжануда,– дейді ол. Айта кетейік, бұл ретте суық вагондарда тоңған жолаушыларға семейлік теміржолшылар бірден көмекке келген. Дегелең мен Локоть станцияларына жеті вагоннан жіберіліп, дер кезінде көмек көрсетілді. Жылдам қимылдау нәтижесінде жолаушылар пойызы кестеден кешіккен жоқ. Кейбір азаматтар Тальго пойызына отырмағандықтарына шағымданғанмен, ешкім жолдан қалмаған. Ал, ақаулық шыққан пойыз шамалы жөндеуден өткізіліп, жанармай құйылған соң тексеру мақсатында зауытқа жіберілген. –Күрт төмендеген ауа температурасына байланысты жүк және жолаушылар пойызының қозғалысына ешқандай кедергі келген жоқ. Барлық жылжымалы құрам кесте бойынша жүргізіліп жатыр. Штаттық режим барысы сақталуда. Сол тәрізді жоспар аясында межеленген жүк тиеу, оның ішінде көмір тасымалы шаралары да ойдағыдай жүргізілуде, – дейді бөлімше басшысының бірінші орынбасары. Теміржолшылардың Қаражыра көмірін уақытында жеткізулері нәтижесінде қазіргі күні қалада екі аптаға жетерліктей қара отын қоры бар екен. Аяздың күшіне мінуіне байланысты жаңадан тапсырыстар қабылдануда. Қазіргі күні бөлімшедегі теміржол нысандарының барлығы қатты отынмен толық қамтылған. Жол шаруашылығындағы қызмет те қалыпты. Аяз қайтқан соң қар сенбіліктері басталмақ. Бұл ретте пікір білдірген Семей магистральдық желі бөлімшесі басшылығы барлық міндеттер жоспарға сай жүргізіліп жатқанын айтады. Демек, «қыс шілдесі» шығыстық теміржолшыларды қалыпты режимнен жаңылдырған жоқ, жылжымалы құрамдар жүріп жатыр, қауіпсіздік толық бақылауда.

Шығыста үскірік аяз...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл