Бақылауда – бүйір рамасы

Жаңалықтар

23.01.2018, 12:42

Семей ЖТ бөлімшесі бойынша «Бүйір рамасын бақылау» төрт айлығы өткізілуде. Жүк тасымалы мен транзиттік пойыздардың қозғалыс жиілігінің артуына орай желі бойындағы жұмыстар жүйеленіп, шұғыл тексеру және тиісті шара қабылдау ісіне мән берілуде. Әсіресе, вагон шаруашылығы мен локомотившілер, пойыз құрастырушылары жұмысы бойынша арнайы акциялар өткізіліп, ілкімді шаралар қолға алынуда. Әрине, қай кезде де қыс мезгілі Шығыстағы вагон қараушылары үшін үлкен жауапкершілік ала келеді. Себебі, ауа температурасының күрт төмендеуі жүк вагондары арбасының құйма бөлшектері мен бүйір рамаларының аязға шыдас бермей морт сынуына немесе жарықшақтануына алып келеді. Міне, осы орайда өткен желтоқсан айының 15-нен сәуір айының 15-не дейінгі аралықта «Бүйір рамасын бақылау» атты күшейтілген режим орнатылып, төрт айлық өткізілуде. Ал, бұл ретте бөлімше бойынша ревизорлық бригадамен қатар басшылық құрамнан тұратын арнайы комиссия желі бойында рейдтік сапарларға шығып, қарқынды жұмыс жүргізуде. Көзделген мақсат – жүк вагондары арбасының құйма бөлшектерінің сынуының алдын алып, пойыз қауіпсіздігін қамтамасыз ету. Аталмыш тоқсандыққа орай әсіресе, вагон шаруашылығына баса көңіл бөлінуде. Атап айтсақ, бірінші кезекте, вагондарды жөндеу мен қабылдап алу, станцияға келіп тоқтаған жылжымалы құрамдарды тексеру ісі қатаң қадағалауға алынды. Сол тәрізді бүйір рамаларын дефектоскопиялық тексеруден өткізу мен техникалық күтім бекеттеріндегі кешенді жұмыс та қатаң назарда. Ол мақсатта арнайы құрылған инструкторлық құрам мүшелері кезекшілік атқаруда. Бір бұл емес, әсіресе ірі станцияларда локомотив бригадалары мен пойыз құрастырушылары арасында тиісті инструктаждар өткізілуде. Осынау бағыттағы атқарылып жатқан іргелі шаралардың барлығы да бөлімше басшысы Марлен Көкірекбаевтың тікелей қадағалауында алынған. Осы орайда бөлімшенің басшылық құрамынан тұратын комиссия мереке күндерінде де желі бойына шығып, шұғыл тексеру жұмыстарын жүргізуі жоспарланған-ды. Бүгінгі таңда бөлімшеге қарасты пойыз қозғалысына бірінші кезекте жауапты мекемелер теміржолшылары айлықтың талабымен толық таныстырылған. Аталмыш бағыттағы шаралар қызметкерлердің қырағылығын арттырып, жұмыс барысында сергек әрі бабында болуларына ықпал етеді.

Бақылауда – бүйір рамасы

Басқа да жаңалықтар

Қазақстан теміржолшысы газеті, №32-33 28 сәуір 2026 жыл