Көмек пен кеңес берді

Жаңалықтар

16.02.2018, 18:24

Қызылорда ЖТ және магистральдық желі бөлімшесінде құзырлы орган мамандарымен бірге «Азаматтарды қабылдау күнін» өткізіп, онда теміржолшыларды әлеуметтік тұрғыдан қолдау, Елбасы жолдауында айқындалған басым бағыттардың орындалуы мен міндеттері жайында пікір өрбіді. Бөлімшелердің қызметкерлер құрамымен жұмыс жасау бөлімі, Қызылорда қалалық жұмыспен қамту және әлеуметтік бағдарламалар бөлімі және «Теміржол» филиалы өкілдері ұйымдастырған қабылдаудың ең өзекті тақырыбы – теміржолшылардың әлеуметтік бағытта жан-жақты қамтамасыз етілуі болды. – Қоғамдық қабылдау күнінде 20 шақты теміржолшының талап-тілегі тыңдалды, олардың дені әлеуметтік тұрғыдағы мәселелермен келіпті. Бүгінгі тақырыптық қабылдауда бөлімше бойынша жұмыс жасайтын мүмкіндігі шектеулі және отбасында осындай өзгенің қолдауына мұқтаж жандары бар теміржолшылардың хал-жағдайы тыңдалды. Оларға құзырлы органдардан берілетін әлеуметтік, материалдық және медициналық көмектердің қолжетімді болуы, оны алуы үшін тиісті құжаттарды әзірлеу жолдары және ұжымдық шартта көрсетілген жеңілдіктерді тиімді пайдалана білуі жайында көмек пен кеңес берілді, сауалдарын оңтайлы шешу жолдарын қарастырды, -дейді Қызылорда ЖТ бөлімшесінің қызметкерлер құрамымен жұмыс жасау бөлімі бастығы Нұрлан Бимұратов. «Теміржол» филиалы төрағасының бірінші орынбасары Базара Танбаева Елбасы Жолдауында мүмкіндігі шектеулі азаматтарға көбірек көңіл бөлінгенін айрықша атап, оларды белсенді өмірге бағыттау «Нұр Отан» партиясының басты міндеті екенін айтып өтті. Мүмкіндігі шектеулі азаматтардың өмір сүру сапасын жақсартуға бағытталған жоба аясында азаматтарға әлеуметтік, денсаулық саласы бойынша жәрдем алуда мемлекеттік бағдарламалардың тетіктері мен шарттарын білуге, сондай-ақ, толғандыратын сұрақтары бойынша нақты жауаптар алуға мүмкіндіктері барын ескертті.

Көмек пен кеңес берді

Басқа да жаңалықтар

«Қазақстан теміржолшысы» газеті, №60 23 шілде 2024 жыл