Менің мектебім – мұражай

Жаңалықтар

06.03.2018, 15:01

Оқуға 2 мин

Ақтөбе магистральдық желі бөлімшесіне қарасты теміржолшылар мұражайының есігі үнемі айқара ашық тұрады. Теміржол басқармасы ғимаратына кірген кез келген жанды «менмұндалап» шақырып тұратын тарихи орда жәдігерге бай. Келесі жылы құрылғанына 30 жыл толатын мұражайда Батыс Қазақстан теміржолының құрылып-қалыптасу тарихы мен оның дамуы туралы құнды деректер мен мағлұматтар, сонау Ташкент-Орынбор теміржолы кезінен бергі жәдігерлер мол жинақталған. Соңғы екі жылдан бері мұражай меңгерушісі қызметін атқарып отырған Анар Жұбаеваның айтуынша, мұражай оның мектебіне айналған. Талай құнды деректермен таныстырған сарғайған газет қиындылары, альбомдар мен тарихи құжаттармен қоса жылжымалы құрамдардың макеттері, жез қоңырау, т.т. өткен ғасырдан сыр шертіп, сол дәуірдің жанды суретін көз алдыңа келтіретіні анық деп санайды. Батыс Қазақстан темір жолында еңбек сіңірген, әр түрлі жылдары өз қызметтерін атқарған атақты теміржолшылар стенді де тағлымды да бай дереккке толы. «Сонымен қатар, осыдан шамамен он-он бес жылдай бұрын ашылған Хромтау-Алтынсарин теміржол тармағы, Жезқазған-Бейнеу жаңа темір жолы құрылыстарына қатысты стендтер пайда болды.Енді, міне, Ақтөбе рельсарқалық зауытының ұрылысы, жұмысы мен технологиялары туралы ақпарат беретін стенд жасалынып жатыр», – деп мәлімет берген музей меңгерушісі біздің мұражайға саяхатымызды ұйымдастырған еді. Таяуда мұражай құрылымында өзгерістер болды. Бүгінгі таңда мұражай Астана қаласында орналасқан ғылыми-техникалық ақпарат және сараптама орталығының қарауына өтті. Мұражай экспонаттары мұражай қорының журналына сәйкес тізімге алынып, автоматтандырылған басқару жүйесіне енгізіліп жатыр. «Мұражай қорын электронды базаға енгізу барысында барлық экспонаттар фотоға түсіріліп, әрбірінің сипаттамасы толтырылды», – дейді Ақтөбе магистральдық желі бөлімшесіне қарасты ғылыми-техникалық ақпарат және сараптама орталығының басшысы Майра Өмірзақова. Бүгінде мұражай ауданы 375 шаршы метрді құрайды. 362 экспонаттың 155-і негізгі қорда тіркелген, қалғандары – мұрағаттағы құжаттар мен фотокарточкалар, т.б. «Бізге экскурсияға қаладағы оқу орындарының студенттері мен оқушылары жиі келеді. Болашақ теміржолшылар да бар, өндірісте жүрген қызметкерлер де бар, қызығушылық тек артып келеді. Жастар жағы пойыздардың, тепловоздар мен паровоздардың, вагондардың кішкентай макетін қызықтаса, аға буын құжаттар мен фотоларға ұзақ шұқшияды, ондай кезде олармен өзім білетін дерек пен дәйекті бөлісуге дайын тұрам», – дейді мұражай меңгерушісі.

Менің мектебім – мұражай

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл