Балалы үйдің бақыты

Жаңалықтар

06.03.2018, 15:29

Теміржол станциясында тауар кассирі болып жұмыс жасайтын Лаура Піржанова – алты бала тәрбиелеп отырған келіншек. Батыр ананы Халықаралық әйелдер күні мерекесімен құттықтап, отбасымен танысып қайтқан біз балалы үйдің бақыты қандай болатынын көзімізбен көрдік. Жосалы кентінде тұратын Әлішер мен Лаураның отбасы баланың кіршіксіз күлкісінен бақытқа бөгіп тұрған жып-жылы ұя екені босағадан аттағаннан-ақ сезіліп тұрды. Отбасының үлкені Нұрасыл 13 жасқа, Бекасыл 11 жасқа толып, артынан ерген бүлдіршіндерді ойнатып отыр, оларға қамқор болуға жарап қалыпты. Сегіз жасар Гүлфайруз болса анасының нағыз жанашыры көрінді, қыз болғандықтан анасына қолғанат болып, асүйде дастархан жасап жүр. Ал бес жасар Сырым мен үш жасар Сауран және былтыр ғана дүниеге келген Бегім-сұлу алаңсыз ойын құшағында, шағын шаңырақты шуаққа бөлеп жүр. Қызығы таусылмайтын базарлы отбасының тіршілігі де толастамайды. Отағасы Әлішер де жұбайына көмектесіп жүріп, ара-арасында балаларының ойынына араласып, бірін мойнына мінгізіп, бірін арқасына салып, үлкендерімен алысып-жұлысып ойнайды – Лаура Піржанова 2003 жылдан бастап Жосалы станциясында тауар кассирі болып жұмыс жасайды. Сол кездерде станцияда жұмыс жасап тұрған мұнай-газ терминалының қым-қуыт жұмысы шаш етектен болатын. Терминалда жұмыс жасайтын теміржолшылар үшін демалыс деген болмайтын. Олардың арасында Лаура да жүретін екі өкпесін қолына алып жүгіріп. Бірақ еш уақыт шаршадым демейтін қайсарлығы сол кезде сезілетін. Сол қайсарлығы ғой, баласын да дүниеге әкеліп, көп ұзамай жұмысқа шығып, үйін де тап-тұйнақтай ұстап, бәріне үлгеріп отыр. Қазіргі таңда Әшірбековтер отбасында баланың санына, туылуына байланысты берілетін әлеуметтік, материалдық көмектердің барлығы Лаураға да берілуде. Біздің Ұлттық компанияның атынан да сый-сияпаттар келіп тұрады,– дейді Жосалы станциясының іс жүргізушісі Бағдагүл Исмағұлова. Әшірбековтер отбасының отағасы Әлішер станциядағы желілік полиция бөлімінде еңбек еткен запастағы офицер екен. Өзі – белгілі теміржолшылар әулетінің өкілі. Лаураның анасы да 40 жыл теміржолшы болса, ағасы станция кезекшісі болып жұмыс жасауда екен. Қысқасы, екеуі де теміржолға кездейсоқ келген жандар емес. Біз бір-бірімен асыр салып ойнап жатқан балалардың уайымсыз тіршілігін қызықтап, «бір қозы туса, бір түп жусан артық өседі» деген мақалды еске алдық, яғни мына бүлдіршіннің әрқайсысының несібесі алатаудай шығар» деп ой түйдік, ата-ананың қамқор бауырында өсіп келе жатқан ағайынды алты баланы қызықтап.

Балалы үйдің бақыты

Басқа да жаңалықтар

Қазақстан теміржолшысы газеті, №65 18 тамыз 2026 жыл