Отбасы құндылығы

Жаңалықтар

16.03.2018, 17:55

Семей ЖТ бөлімшесінде теміржолшы қыз-келіншектерге арналған ерекше тренинг болып өтті. «Табысқа қалай жетуге болады?» деп аталатын әлеуметтік-психологиялық тақырыптағы айрықша шараға бөлімшенің кәсіподақ ұйымы ұйытқы болған еді. Тренингке бөлімше мен құрылымдық мекемелерден белсенді әйелдер қауымы қатысты. Еркін әңгіме түрінде өрбіген тренингте сөз алған «ҚР теміржолшылар кәсіподағы» қоғамдық бірлестігінің Семей өңірі бойынша өкілі Алик Досанов нәзікжандыларға бөлімше басшылығының құттықтау лебізін жеткізіп, аталмыш шараның сәтті өтеріне сенім білдірді. Осыдан соң кең залда шеңбер жасап жайғасқан теміржолшы әйелдер ерлер үшін жабық саналатын бірқатар тақырыптар аясында өзара сұхбат құрып, ой мен бойды қатар сергітетін психологиялық жаттығуларды бастан кешті. Жалпы, тренингтің мақсаты кәсіби қызметке шексіз беріліп, мінез-құлықтары да ресмилене бастаған әйелдер қауымын тұрмыс барысында мейлінше ұтқырлыққа бейімдеу, отбасындағы, қызметтен тыс қоғамдағы рөлін арттыру болатын. Сәйкесінше, қозғалған тақырыптар мен психологиялық жаттығулар да осыған бағытталды. Теміржолшы әйелдер қауымы үй-тұрмыс, жұбайылық өмір, жұмыс орны мен отбасындағы зорлық-зомбылықты болдырмау, бала тәрбиесі, тіпті, көрші-қолаңмен қарым-қатынас сынды бірқатар қызықты тақырыптар бойынша өзара еркін пікір алысып, шиеленісті жағдайлардан шығудың сан алуан тәсілдерімен танысты. Өзара тәжірибе де алмасты. Осылайша, нәзікжандар қауымының сырласу клубы түрінде ұйымдастырылған әлеуметтік-психологиялық тренинг теміржолшыларды бітпейтін қызметтік өмірден бір сәт ажыратып, жеке өмірдің құндылықтарын қастерлеуді, алдыңғы кезекте абзал ана, асыл жар бола білуді ұмытпауды да еске салды.

Отбасы құндылығы

Басқа да жаңалықтар