Бейнеттің зейнеті бар

Жаңалықтар

28.03.2018, 17:05

Бақытжан Қабиевті теміржолшылар қауымы іскер азамат ретінде таниды. 17 жыл бойы Ақтөбедегі «Теміржолсу» мекемесін басқарған оны ұжымы наурыз мерекесі қарсаңында құрметті еңбек демалысына шығарып салды. Осы жылдар ішінде өзін білікті басшы, шебер ұйымдастырушы ретінде көрсете білген Бақытжан Мұсаұлы «Теміржолсу-Ақтөбе» ЖШС-ін талай рет үздіктер қатарынан көрсете білген екен. Компания басшылары бір жылдары Ақтөбеде республикалық семинар ұйымдастырып, олардың тәжірибесін басқаларға үлгі еткен. Мекеменің кадрлар бөлімінің басшысы Гүлжан Көптілеуова бастаған ұжымдастары Бақытжан Қабиевке жылы лебіздерін жеткізіп, ендігі уақытын өзіне арнағысы келген жанға денсаулық, берекелі де мерекелі ғұмыр тіледі. Бақытжан Қабиев Ресейдің Орынбор облысында дүниеге келген. «Теміржолсу-Ақтөбе» ЖШС-ін басқарған жылдар ішінде оның басшылығымен атқарылған шаруалар шаш етектен. Соның ішінде Қандыағаштағы жылу трассаларын қалпына келтірген, шеберхана мен су өткізу желілерін жөндеуден өткізген, Атыраудағы теміржол мекемелерінің су құбырларын ретке келтіріп, көптеген разъездердегі желіні жаңартқан, Мұғалжар ауданындағы Жұрын станциясының су мұнарасына күрделі жөндеу жүргізген, Саржар ауылының желілерін жөндеген еңбектерін ерекше атап айтуға болады. Теміржол саласында соңғы жылдары іске қосылып жатқан жаңа тармақтар бойынша да көптеген іс тындырылды. Ең бастысы, осы салаға маманданған тәжірибелі жандардан құралған ұжым қалыптастыра білді. Теміржол саласының дамуына елеулі үлес қосқаны үшін Бақытжан Мұсаұлы 2014 жылы ҚР Көлік және коммуникация министрінің және «Қазақстан темір жолы» Ұлттық компаниясы» АҚ президентінің Алғыс хатын алды. 2016 жылы ҚР Тәуелсіздігінің 25 жылдығы медалімен марапатталса, 2017 жылы «Адал еңбегі үшін» медалінің иегері атанды.

Бейнеттің зейнеті бар

Басқа да жаңалықтар

Қазақстан теміржолшысы газеті, №16 03 наурыз 2026 жыл